Искусство
«Чон кӧргем дене эрыкан улмем шижам», –
манеш «Студия.Project» театрын актёржо, Чакмарий кундемыште шочын-кушшо марий рвезе Василий Молодцов
«Россий-1» канал дене «Склифосовский» телесериал 2012 ий гычак шуйна. Тудым мый коклан гына ончем. Но кодшо арняште Звенигово район Чакмарий школ директор Владимир Геннадьевич Кашков «Ончыза, утарыше Диман рольжым мемнан выпускникна, проста марий рвезе Василий Молодцов модеш» манын сералтыш Мер Каҥашын группышкыжо, да «Кудыжо гын?» эскераш пижым. Теве тудо, моло деч кӱкшырак капан йытыра рвезе, марийла пешыже ыш кой гынат, тудак манын палышым. Кастенак Василий деке серышым возышым. Эрдене вашмутат тольо – ялт марла серыме, ик йоҥылыш деч посна. Варажым тудо, илыш да актер пашаж нерген «иктаж мутшым шкенан вел семын возем, да огыда умыло» манын, рушла вашештыш.
Василий 1989 ийыште Чакмарий селаште кум икшыван ешыште шочын-кушкын. Ача-ава куан – кум эрге. Но пӱралтын улмаш нуным авалан шкетшылан йол ӱмбаке шогалташ – 2004 ийыште еш оза Василий Михайлович ӱмыр лугыч лийын. Тунам Васёк школыш коштын, Миша МарГУ-што 1 курсышто тунемын, физкультур туныктышо лияш ямдылалтын, а Вадим изашт Красноярскысе военный училищыште тунемын. Ачашт шке жапыштыже водительлан тыршен, авашт Раисия Владимировна шочмо кундемыштак бухгалтерланат, страховой агентланат ыштен. Но пелашым йомдарымеке, тудлан Москваш каяш логалын. Раисия Владимировнам нимогай пашат лӱдыктен огыл – дворникланат ыштен, уборщицыланат. Икшыве-шамычым чын илыш корныш лукташ, нунылан кӱшыл шинчымашым пуаш кӱлын. 2009 ийыште ешым эше ик ойго ӱмылтен – Вадимын илышыже кӱрылтын. Кугурак эргым поген пыштыме деч вара ӱдырамашлан мом чыташыже пернен?.. «Авана уло ӱмыржым ачанам, эргыже-влакым йӧратымашлан пӧлеклен. Тудо – мыйын Героем. Авай ачайым икымше ончалтыш гычак йӧратен шынден да… кызытат йӧрата», – ойла Василий.
Чакмарий кыдалаш школ деч вара 2012 ийыште В.Молодцов МарГУ-што «экономике управлений дене педагог» специальностьым налын. 2013-2014 ийлаште чоҥымо компанийыште снабженецлан ыштен, а вара йӧршеш вес корным ойырен – 2014 ийыште Москвасе Останкино телевидений да радиовещаний институтышто актёр мастарлык курсыш тунемаш пурен. Мастерже Россий Федерацийын сулло артистше Е.Германова лийын. Евдокия Алексеевна икымше выпускникше-влаклан чумырымо «Студия.Project» театрышкыже Василийым кокымшо курс гычак ӱжын. «Тиде оксам тӱлен тунемме курс. Коклаштына эсогыл 40-50 ияш-влакат лийыныт. Кугыжаныш вузыш пураш йӧнем лийын огыл, молан манаш гын мый тунемме коклаштак ик компанийыште ужалыме отделыште пашам ыштенам. А вузышто вет пӱтынек туштак «илыман» манаш лиеш…» Но 2015 ийыште Василий театрыш йӧршешлан куснен.
«Студия.Project» театрыште землякна ынде шымше ий модеш. Тиде жапыште В.Молодцов латиндеш спектакльыште («Приключения Дон Кихота», «Гроза», «Рыжий. Честный. Влюбленный», «Шукшин: один день из сельской жизни», «Американская мечта» да молышто) рольым чоҥен. Кызыт нине спектакль театрын репертуарыштыже уке улыт. Туге гынат Москваште илыше-влак Василийын модмыжым февраль-мартыште «Слишком женатый таксист», «Идеальный муж», «Мой Марат», «13 первых правил баскетбола» постановкылаште ужын кертыт. А икымше рольжо «Грозаште» Борисын образше лийын.
В.Молодцовым вуз деч вара йӧршеш вес направленийым ойырен налаш мо таратен? Тидын шотышто землякна тыге вашештыш:
– Йоча годым футболист лийнем ыле. Но селаштына футбол дене заниматлалташ йӧн лийын огыл. Вара артист корно дене каяш шонымаш чотак авалтен. Моланжым умылтаренат ом мошто. Школышто чӱчкыдын тӱрлӧ сценкыште модынам. Тиде мыланем келшен. Адакше мокталтымымат шуко гана колынам. Тидыже эшеат чот куандарен. Да молын ончылно сайрак кояш тыршенам, чаплырак лийнем ыле моли… (воштылеш). А кызыт мый театрыште модмем дене моткочак кугу ракатым (удовольствийым) налам. Тидын годым чон кӧргем дене эрыкан улмем шижам, илышыште лекше ятыр йодышлан вашмутым муам. Театр мыйым шуко молан туныкта.
В.Молодцовым фильмлаште модаш 2014 ий гыч ӱжаш тӱҥалыныт. Икымше рольжо – «Мент в законе» сериалыште подозреваемый Сергеев. Тылеч вара – «Паутина-9» (Горшок), «Солнечный круг» (каратист), «Склифосовский» (утарыше Дима)… фильмлаште тудын изирак роль-шамыч лийыныт. Ик съемочный площадкыште лӱмлӧ актёр-влак кокла гыч Российын сулло артистше Максим Аверин дене пашам ыштен. Тудым эше телевӱдышӧ семынат палена. Василий эртыше кечылаште гына сниматлалтше «Стенограмма судьбы» сериалыште участковыйым модын. Туштыжо тӱҥ рольым модшо Карина Андоленко дене пырля ик площадкыште пашам ыштеныт.
Оҥай, а коллегыже-влак марий улмыжым палат мо?
– Да, мутат уке, палат. Авам дене але йолташем-шамыч дене марла мутланымем годым эреак тӱткын колыштыт. Нунылан тиде моткоч оҥайын чучеш. Ялысе весела илышна нерген шуко каласкаленам. Мый пиалан улам – йоча пагытем телефон да компьютер деч посна эртен. Да ончыч ялыште илышыжат чотак шолын…
Василий Молодцов дене мутланымаш шинчаваш эртен огыл. Туге гынат тудын пеҥгыде кӧргӧ виян улмыжо, поро кумылжо, ончыко кыртмен каяш тыршымыже шижалте.
«Тыланена актер пашаштет кугу деч кугу сеҥымашым. Шуко оҥай рольым модаш пиал шыргыжалже. Шке шонымашкет шуаш Юмо полшыжо. Марий калыкым чапландараш кумылет, вий-куатет ситышын лийже» манын сералтышымат, вашмут вигак тольо:
– Кугу тау поро мутланда. Шочмо кундем гыч тыгай эҥертышым шижаш чонлан моткочак сайын чучеш. Чыланат таза лийза!
Светлана Пехметова
Фотом В.Молодцовын воткылысе лаштыкше гыч налме.
