КУЛЬТУР ДА ИСКУССТВО САМЫРЫК ТУКЫМ

Марий мурым чапландараш кумылаҥын

Самырык татар музыкант Эльфис Гараев «Кече лектеш» калык мурылан у аранжировкым ыштен да шкак мурен. Соцсетьлаште колыштшо-влак мурым тӱрлын вашлийыч. Шукыракше рвезылан поро мутым возат.
А кушеч тиде рвезе? Эльфис шукерте огыл шочмо кечыжым палемдыш — 15 майыште тудлан 28 ий темын. Параньга селаште шочын-кушшо рвезе 9 класс деч вара верысе ПТУ-ш механизаторлан тунемаш пура. Тиде жапыштак тудын чонжым музык авалта, чотракше пералтен колтымо семӱзгар-влак келшеныт. Училище деч вара республикысе И.Палантай лӱмеш культур да искусство колледжыште калык семӱзгар-влак пӧлкаш балалайке специальность дене шинчымашым налаш тӱҥалеш. Но кум тылзе гыч армийыш каяш повесткым кучыктат. Армий деч вара уэш студент тӱшкаш ушна, тиде жапыштак тӱрлӧ группо дене пашам ышта. Южгунам «Марий Эл» кугыжаныш куштышо ансамбльышкат ӱжыныт.
Музыкым йӧратыше рвезе шинчымашым келгемдаш шонымо кумыл дене Казаньысе культур институтыш джаз пӧлкашке барабанщик специальность дене тунемаш пура. Кумдан палыме пошкырт мурызо Радик Юльякшин группышкыжо пералтыме семӱзгар-влак дене чаплын шоктышо еҥым кычалын да ик видеошто тӱмырым моштен кырыше рвезым ужын. Эльфисым интернет гоч муэш шке командышкыже ӱжеш. Тыге тудо «Elvin Grey» лейблын составыштыкыже логалеш. Профессионально шуаралташ манын, шке семын тӱрлӧ уым шымлаш да тунемаш тырша.
— Самоизоляций жапыштат мый музык дене пашам ыштымым шым чарне, — каласкала музыкант. — Тиде жапым шкаланем пайдалын эртаренам, уым тунемаш тыршенам. Икмыняр ий ончычак ик палымем йодын ыле: «Марий Элыште илет вет, молан марла от муро». Мый тидын нерген эре шоненам. А кызыт шоналтышым – жап! Марий кундемыште марий калыкын тӱвыражым ужын-колын кушкынам, сандене шукертак шонен коштмемым шукташак тыршышым. Икымше пашам — «Кече лектеш» калык муро, тудлан у аранжировкым ыштенам да шкеак мурышым. Уэмдыме мурым марий-влак сайын вашлийыч. Мурылан клипымат ямдылышна.
Тудо ок шылте – марла кутырен ок мошто, но шукырак мураш тӱҥалам гын, писырак тунем шуам, манеш. Тачысе кечылан Эльфис кум марий мурылан у арнжировкым ыштен да йоҥгалтарен, кокытшылан, самырык автор Надежда Моисеева-Эмыканын «Айда, йолташ» ден «Лий пеленам» почеламутшо-влаклан, семым шкеак келыштарен.
Мутланымашнам Эльфис тыге мучашлыш: «Мый латвич ий тӱмырым кырем. Шкенан элысе шуко олаште да ятыр йот элыште лийынам, оҥай да талантан еҥ-влак дене палыме лийынам да пашам ыштенам. Илыш опытем шотыш налын, самырык-влаклан тыланымашем тыгай лиеш. Еҥ-влак дене кутырен пашам ыштет, эре уым палаш да тунемаш тыршет гын, шонымашке шуаш лиеш. Тудым илышыш шыҥдараш ида вожыл, ида лӱд! Уло чонда дене тидым шонеда гын, чыла шотлан толеш.

Елена Газина Нефтекамск
(Фотом Э.Гараевын лаштыкше гыч налме.)

      

Опубликовать в Одноклассники

Добавить комментарий