КУЛЬТУР ДА ИСКУССТВО СЫМЫКТЫШ ТЕАТР

Марий семмастарын лӱмжӧ – квартетлан

Музыкым йӧратыше-влаклан 24 декабрьыште Актёрын пӧртыштыжӧ Андрей Эшпай лӱмеш квартет чапле концерт программым эртара. Тудо «Рождественская рапсодия» маналтеш.

Ты коллективыш музыклан изинекак шӱмаҥше, семӱзгарым шокташ йӧратыше ныл уста еҥ ушнен. Тиде – Надежда Семенова (1-ше скрипке), Эльвира Егорова (2-шо скрипке), Люция Елизарова (альт) да Марина Ежова (виолончель). Чыланат Э.Сапаев лӱмеш опер да балет театрын оркестрыштыже шоктат да туныктымо пашам шуктат: Надежда Александровна – Национальный искусство гимназийыште, Эльвира Михайловна – Йошкар-Оласе 6-шо №-ан йоча искусство школышто, Люция Явитовна ден Марина Валерьевна – И.С.Палантай лӱмеш тӱвыра да сымыктыш колледжыште.

Э.Сапаев лӱмеш опер да балет театрыште квартет ончычат лийын улмаш. Тушто кугурак ийготан музыкант-влак шоктеныт, садлан ик жап гыч квартет «шаланен».

А чон музыкым шокташ, концерт программе дене калык ончыко лекташ ӱжын. Адакшым театрын оркестрышкыже самырык музыкант-влак Надежда Семёнова ден Эльвира Егорова ушненыт. У вий дене уэш изирак коллективым чумыраш шонымо нерген театрын художественный вуйлатышыже Константин Анатольевич Ивановлан ойленам. Шонымашем сайлан шотлен. Изирак коллективланна лӱмым шуко кычалынна, тудым чапланыше марий музыкант, композитор денак кылдаш шоненна: Эрик Сапаевын лӱмжым театр, Палантайыным училище нумалыт. Садлан квартетнам Андрей Эшпайын лӱмжӧ дене кылдышна, – палемдыш музыкант, квартет вуйлатыше Люция Елизарова. – Адакшым Андрей Яковлевич дене консерваторий деч вара училищыш пашам ышташ толмекак палыме лийынам.

Квартет икымше гана ӱмаште тыгаяк жапыште калык ончыко лектын…

!!Материалым тичмашнек 23 декабрьыште лекше (2022 ий) «Марий Эл» газетыште лудаш темлена

 

А.БАЙКОВА

Опубликовать в Одноклассники

Добавить комментарий