Калык ожнысек сурт-оралтым оролаш капка воктеке пийым шинчырлен шогалтен. Тудын оптымо йӱкшӧ деч лӱдын, шукынжо еҥ деке пураш тоштын огытыл. А пытартыш жапыште яллаште сӱрет сайынак вашталтын: оралтым кӱкшӱ савар дене авырен налыт, а иктаж-кушко каяш тарванат гын, капкаштым сравоч дене тӱкылен кодат.
Йолташ-влак, те пийым ашнеда? Капкам сравоч дене сурален кодымо шотышто мом каласен кертыда.
Екатерина ТЕТЕРИНА, «Ончыко» журналын ответственный секретарьже:
– Пий деч изи годсекак лӱдам, молан манаш гыч икмыняр гана пурлыныт. Сандене пийым ороллан нигунамат шотлен омыл да шотлаш ом тӱҥал. Адакшым пийым, пырысым ончен, сулыкыш пурымыла веле чучеш: вет нунат чонан улыт, кунам-гынат шортыт, черланымышт годым орланат, южгунамже шкежат нуным вурсен але эсогыл йол йымалне мешайымышт годым чумалын колтен кертына. Кӱкшӱ саварымат орол манын ом керт. Мемнан пӧртна уло. Печымат печенна. Но тудым орол семын огыл, а мыйын мом ыштымем нигӧ ынже уж шонымаш дене ыштенна. А пӧртым кызыт оролыманак. Тачысе илышыште эн сай йӧнлан видеокамерым шотлем. Тушто кӧн толын кайымыже, мом ыштымыже оза-влаклан чыла коеш.
Галина ВОЛКОВА, сулен налме канышыште улшо (Советский район Ӱшнӱр села):
– Ожнысек ойлат: «Пий – айдемын йолташыже». Мемнанат пийна уло, кугу урлык огыл, сурт-печымат орола, иктаж кӧ толеш гын, опталтен, йӱкымат пуа. Суртнам йыр пече дене печыме, чыла коеш. Ял мучаште илена гынат, капкаште нимогай сура, тӱкылтыш уке. Пелашем мӱндыр верыш вахте йӧн дене пашашке коштеш, сандене пий деч посна лӱдыкшын тучеш.
Кӱкшӱ савар дене авырен налме сурт-пече мыланем пешыжак огеш келше. Айдеме калык дечын шылын илышаш огыл, шонем.
Валентина ЕФРЕМОВА, Марий Эл культурын сулло пашаеҥже:
– Мыйын пий уло, но тудо ынде шоҥго, Пылышыжат начарын колеш. Шукыж годым мала. Мыйым ужешат вара э-эй, опташ тӱҥалеш, пуйто оза, мыят пашам ыштем маннеже.Пийна осал огыл, пӧрт шеҥгелне шога.
Пашаш кайымеке, урем капкам петырен кодем. Чылан мӧҥгыштӧ улмо годым тудо эреак почмо.
Елена ЛЕБЕДЕВА, Шернур район Памашсола ял шотан администраций вуйлатыше:
– Пийым ашнена. Иктаж кӧм пурлын кертеш манын, савар воктеч кораҥденна. Тыге ыштыме дене кудывечат яндаррак, пуш, пун да молат уке.
Капкам сурален кодымаш уке, мӧҥгыштӧ ала-кӧ гынат эреак уло.
Алевтина БАЙКОВА ямдылен
Авторын фотожо
