Социальная жизнь
СОЦИАЛ ИЛЫШ

«800 теҥгем кушто муам?»

Пӱсӧ йодыш

Лишыл жапыште эмлымверыш вочшаш улам. Шкат паледа, тушко ВИЧ-лан, СПИД-лан да гепатитлан тергалтме деч посна огыт пыште. Верысе лабораторийыште тыгай анализым огыт ыште, сандене СПИД да инфекциян чер ваштареш кучедалме, профилактикым эртарыме республикысе рӱдерыш каяш темлат. Туштыжо нине анализлан 800 теҥгем тӱлыман. Йӧра, мыйын оксам уло, анализым тӱленат ыштыктем, но илалше ик ӱдырамашын азапланымыже чонышкем логале. «Врач вес арнян эмлымверыш пышташ сӧрен, тушко палемдыме чыла анализ дене толаш кӱштен. Кушто мый кызыт 800 теҥгем муам?..» – тургыжланен мане тудо.

Чынак, нине кум анализ деч посна эмлымверыш огыт пыште. А тудым ыштыкташ окса уке гын, кузе лийман? Колыман мо? ВИЧ-лан, СПИД-лан да гепатитлан Медведевыште веле огыл, Йошкар-Оласе 4-ше №-ан поликлиникыштат тергалташ огеш лий, маныт…

В.Тойшева.

Медведево посёлко.

 

Лудшын йодышыжым рашемдаш манын, ончыч Медведево районысо рӱдӧ эмлымверын поликлиникышкыже йыҥгыртышым. Приёмный секретарьын ойлымыж почеш, тӱҥ врач С.Трохимец районыш лектын ыле, сандене тудын поликлинике паша дене алмаштышыже Е.Бастракова дене мутланышым.

– Кӧ улмыдам, мом шонен йыҥгыртымыдам мый кушеч палем?!. Те, журналист-влак, мемнан нерген ынде мом-гына огыда возо. Нимом ом вашеште, тӱҥ врач дене кутырыза, – кӧ улмем, могай амал дене йыҥгыртымем тӱҥалтыштак умылтарышым гынат, тыге вашештен, телефон пучым кудалтыш Елена Владимировна.

– Мӱшкыран ӱдырамаш, онкологий чер дене орланыше, тыгак военный-влакын вӱрыштым процедурный кабинетыште нимогай уто-сите деч посна налыт да вес вере тергыктат. Мемнан дене тыгай анализым огыт ыште, молан манаш гын тудо пеш шергын шуэш, маныт, – йодышемлан вашештыш регистратор.

Лудшын йодышыжлан тичмаш вашмутым налмемла ыш чуч, сандене тӱҥ врач Светлана Романовна деке вес кечын кечыгут йыҥгыртышым да совещанийым эртарымыже, министерствыш миен толмыжо, поликлинике пашам тергымыж деч вара кастене веле кучен кертым.

– Лудшыдам могай врач СПИД да инфекциян чер ваштареш кучедалме, профилактикым эртарыме республикысе рӱдерыш колтен? Да, мемнан лабораторийыште ВИЧ-лан, СПИД-лан да гепатитлан анализым огыт ыште, но пациентлан тиде кӱлешак гын, вӱржым процедур кабинетыште налыт да Чебоксарыш тергаш колтат. Тусо ик лабораторий дене тидын шотышто контрактым шукертак ыштенна. Диспансеризацийым эртыше-влакым СПИД да инфекциян чер ваштареш кучедалме, профилактикым эртарыме республикысе рӱдерыш тергалташ колтена, тушто нунылан СПИД-ланат, ВИЧ-ланат, гепатитланат анализым яра ыштат. Мыйын шонымаште, нине черлан тергалтме шотышто поликлиникыштына нимогай чарак уке, сандене йодышат лекшаш огыл, – тыматлын вашештыш Светлана Романовна.

– Мемнан поликлиникыште тыгайже лийынат огеш керт! – лудшынан йодышыж шотышто йыҥгыртымемлан ӧрынрак вашештыш Йошкар-Оласе 4-ше №-ан поликлиникын тӱҥ врачшым медицине ужаш дене алмаштыше Марина Владимировна Вяткина. – Поликлиникышкына пеҥгыдемдыме чыла пациент лабораторийыштына ВИЧ-ланат, СПИД-ланат, гепатитланат яра тергалтын кертеш. Анализым ышташ чыла материал уло. А СПИД да инфекциян чер ваштареш кучедалме, профилактикым эртарыме республикысе рӱдерыш тӱҥ шотышто поликлиникыш пеҥгыдемдалтдыме пациент-влакым колтат.   

Теве тыгай вашмут. Мучашлан иктым гына ушештарен кодынем: поликлиникыш пеҥгыдемдыме пациент лачшымак могай медицине услуго дене яра пайдаленен кертмыжым кугыжаныш категорийыш пурышо йоча медицине рӱдерыште да клиникыште, ӱдырамаш консультацийыште, азам ыштыме пӧртыштӧ, медицине рӱдерыште, поликлиникыште, диспансерыште да специализироватлыме моло тӧнежыште шкеак рашемден кертеш.  

М.ИВАНОВА.

Опубликовать в Одноклассники

Добавить комментарий