СОЦИАЛ ИЛЫШ

Эрыкын моторжо

27 августышто Граждан-влаклан социально полшышо да нуным аралыше «Свобода» чуваш мер организаций Чуваш Республикын Мер палатыж дене пырля «Мадагаскар» рӱдерын площадкыштыже «Мисс «Свобода-2017» регион-влак кокласе конкурсым кумшо гана эртарен. Тудым тазалыкыште экшык улман, инвалид ӱдыр-влаклан пӧлеклен. Тӱҥ титулым Шернур районысо Аҥанур ялыште шочын-кушшо марий ӱдыр Ольга Пасеева сеҥен налын.

– Тиде конкурсыш Марий Эл гыч кумытын миенна: мый, Ольга Ребко да Анна Матвеева. Тыгай сынан мероприятийыште чыланат икымше гана участвоватленна. Конкурслан кӱлынак ямдылалташ тыршенам: тӱрлӧ кырча-марча деч посна «Максимум» спорт куштымаш рӱдерын вуйлатышыже, хореограф Максим Александрович Сильдугановын полшымыж дене Наргизын «Нас бьют, мы летаем» композицийже негызеш характерный, волевой манме куштымашым  тунемынам. Тудым жюрин еҥже-влаклан, конкурсыш толшо калыклан коляскыште шинчен, коляске дене кудалыштын ончыктенам… Эрык нерген умылымашемат, утыжым шонкалыде, кӱчыкын да раш почын пуэнам: каваште чоҥештылше кайык чыла шотыштат эрыкан, – манеш «Мисс Свобода-2017» конкурсын сеҥышыже Ольга.

Икмыняр ий ончыч пӱрымаш тиде ӱдырым инвалид креслыш шынден, но Ольга шкенжым ныл пырдыж коклаш петырен огыл, умбакыжат тичмаш, таза айдеме семын илаш вийым муын. Таче тудо – «Знак равенства» организацийын чолга еҥже, шкеж гаяк ӱдыр-рвезе-влак дене пеҥгыде кылым куча, тӱрлӧ мероприятийыште участвоватла.  

– Тыгай титулым сеҥен налын кертмемлан моткоч куаненам, чонем каласен да умылтарен мошташ лийдымын юарла! Ӱдыр-шамычат приз деч посна пӧртылын огытыл: Анна вице-мисс лие, Ольга «Мисс Талант» титул дене палемдалте. Ынде Питерыште вийнам тергаш шонена, – куанен палдарыш чолга ӱдыр.

…Тыгай еҥ-влак кугешныме кумылым луктыт, шкешт почеш тарватат. Тек ӱдыр-влакым ик сеҥымаш почеш весе вуча, тек нуным Юмо арала.

М.ИВАНОВА.

Снимкыште: «Мисс Свобода-2017» – Ольга Пасеева.

Фотом Граждан-влаклан социально полшышо да нуным аралыше «Свобода» чуваш мер организацийын сайтше гыч налме.

Опубликовать в Одноклассники

Добавить комментарий