«Ик тылзе гыч 80 ияш лиям. «Ну мо, шоҥго карта, эше илет? Иле, иле, вет вашке поет! Тунам вара йот элыш каналташ чоҥештена. Лачак корным почыт», – телефон дене кажне йыҥгыртымыжлан воштылеш йоча годсек келшен илыме йолташ ӱдырем. Шкеже мый дечем ныл тылзат пелылан изи, а 80 ияш-шамычлан пенсийым кугемдыме нерген шукертак пала, но мыняр теҥгелан – огеш ойло. «Марий Эл» газет, ала тый тиде йодышым рашемдет ыле?»
М.Степанова
Звенигово район
Йодышлан Россий Пенсий фондын Марий Элысе пӧлкажын пресс-службыштыжо тыге вашештеныт:
– Йолташ ӱдырда мыскарам огеш ыште: 80 ийым темыше гражданинын пенсийжым чынжымак кугемдат.
2013 ий 28 декабрьыште лукмо «Страховой пенсий нерген» 400-шӧ №-ан федеральный закон дене келшышын, 80 ийым темыше илалше еҥын пенсийже пеҥгыдемдыме выплатын суммыжлан автоматически кугемеш. 2021 ийыште шоҥгылык шотышто страховой пенсийыш тылзе еда тӱлыман 6044,48 теҥге кугыт выплатым пеҥгыдемдыме. Пенсий лачшымак тиде суммылан кугемеш. Тудым 80 ийым темыше гражданинын шоҥгылык шотышто страховой пенсийышкыже йодмаш деч посна палемдат.
Ешартышым шоҥгыеҥын 80 ийым темымыж тылзын ыштат да шушаш тылзе гыч тӱлаш тӱҥалыт.
Марий Элыште 80 ийым темыше 21600 утла еҥ кугемдыме выплатым налеш, ты чот гыч 80 процент наре пенсионерже – ӱдырамаш.
80 ийым темыше I группо инвалидын пенсийже огеш кугем, молан манаш гын пенсионер пеҥгыдемдыме выплатым инвалидность шотышто уже налеш. Закон дене келшышын, тудым пенсийыш кокыт гыч ик негыз почеш ешарат: але 80 ийым темымеке, але I группо инвалидностьым пуымеке.
Тендан гай ийготан-влаклан тылзе еда тӱлыман эше ик выплате уло, тиде – илалше еҥым ончымылан компенсаций. Тудым пенсионерым ончышо пашам ыштен кертше, но пашадыме еҥлан ойырат. Выплатым шоҥгыеҥ дене пырля илыше родо-тукымлан веле огыл, ӧрдыж еҥланат палемдаш лиеш. Тудын суммыжо – 1200 теҥге. Тиде выплатым палемдашлан илалше еҥым ончаш тӱҥалше гражданинлан Пенсий фондыш йодмаш дене толман, а пенсионерлан тудым ончаш келшыме нерген йодмашым возыман. Тидым Пенсий фондын сайтыштыже личный кабинет гочат ышташ лиеш.
М.ИВАНОВА
