Шорык
Тиде арнян мӧҥгыштӧ лишыл еҥ-шамыч дене, пашаште коллеге-влак дене ӱчашымаш тарванен кертеш. Ала-кӧ дене палыме лийыда. Утыжым кугу огыл сатум налыда. Но чыла тиде илышыштыда вашталтышым огеш ыште гаяк. Диетыш шинчаш огеш темлалт.
Презе
Паша дене кӧ дене кылым чӱчкыдын кучеда, нунын дене тиде арнянат ик ойыш куштылгын шуаш тӱҥалыда. Ешыште лишыл еҥ-шамыч дене вашумылымаш озалана. Тӱрлӧ пайремым, поснак сӱаным эртараш келшыше пагыт.
Йыгыр
Пашаште ала-кӧ дене ала-кунам вурседылмаш марте шуын улыда улмаш гын, кызыт сӧрасен кертыда. Ешартыш оксам ыштен налаш йӧн лиеш. Личный илышыште тӱткӧ лийман. Ончыкыжым ӧкынаш огыл манын, кеч-могай ошкылымат шонен ыштыман.
Рак
Тиде арнян шӱдыр-влак кӧргӧ йӱкдам колышташ темлат, уке гын ятыр йоҥылышым ыштен кертыда. Мутлан, келшен толдымо пашам ойырен налме лӱдыкшӧ уло. Йӧратымаш шижмаштат уда велыш вашталтыш лиеш, очыни. Еҥ-шамыч дене ида ӱчаше.
Лев
Тыланда кугурак ийготан-влак деке ой-каҥашлан чӱчкыдынрак эҥерташ темлалтеш. Тыге тӱрлӧ йоҥылышым ыштыме деч утлен, илышдам куштылемден кертыда. Йӧратыме еҥда ала-мо шотышто кумылдам волта гынат, шыдешкаш ида вашке.
Ӱдыр
Чот ноенда гынат, тиде арнян шке пашам сайын шуктыман. Мутланыме годым тӱткӧ лийман, уке гын уда шонымашан ала-могай еҥ ойлымыдам шке кӱлешыжлан кучылт кертеш. Кызыт отпускыш каеда гын, палыза: тудо моткоч сайын эрта.
Виса
Тиде арнян кеч-могай паша ден сомыл ушнаш тӱҥалыт. Вуйлатыше дене ида ӱчаше, уке гын тиде чылажымат локтыл кертеш. У шӱмбелым вашлийында гын, ончычсо илышыж нерген шукырак пален налаш темлалтеш. Кӧ эше вашлийын огыл гын, тиде кызыт лиеш, очыни.
Скорпион
Арня тӱрлӧ пашам тӱҥалаш келшыше лиеш. Поснак – усталык дене кылдалтшым. Тыгайже улмым эше пален огыдал гын, кеч иктым «верештса» – тунамак лектышыжым ужыда. Шкет еҥ-влакым чӱчкыдынак вашлиймашыш ӱжаш тӱҥалыт.
Пикшызе
Тыланда тиде арня куандарыше лиеш. Окса шотышто – ойлыманат огыл. Но шийвундым кучылт пытараш ида вашке. Иктаж-кушко пыштеда гын, утларак ыштен налын кертыда. Йӧратыме еҥ дене тыматле лийза. Шканда мо кузе келша, туге гына ышташ ида тырше.
Ирказа
Тиде арнян кумылда нӧлталтше лиеш. Поснак – йӧратымаш шотышто. Те ондакысе шӱмбелда дене уэш вашлияш тӱҥалын кертыда але чондам у шижмаш авалта. Окса шотышто тургыжланаш логалеш, молан манаш гын вучыдымо роскотыш пуреда докан.
Вӱд йоктарыше
Тӱҥ шотышто арня нимо денат ойыртемалташ огеш тӱҥал. Лач шке нерген ӱлыкшӧ шонымашан улмыда гына кумылдам волтен кертеш. Тидлан кӧрак собеседованийым келшен толдымын эртеда, калык ончылно сайын огыл выступатледа.
Кол
Тендам чыла уда «эртен кошташ» тӱҥалеш, сандене нимо шотыштат тургыжланаш огеш логал. Пӱртӱсыштӧ сайын каналтыза. Пашаште служебный роман тӱҥал кертеш. Но тидым лучо ышташ огыл. Тӱшкан погынымо верыште у еҥ дене палыме лийыда, очыни.