COVID-19

Кид-йол деч поснат кодаш лиеш

У коронавирус инфекцийым чытен лекше шагал огыл пациентлан моло дене пырля эше «тромбоз» диагнозым шындат. Тиде чер кид-йолышто вÿр коштмо пашам локтылеш да эсогыл айдемын капкыл ужашыжым пÿчкын кораҥдыме марте шуктен кертеш, 9 февральыште увертарен медицине науко доктор, Россий Федераций Тазалык аралтыш министерствын А.В.Вишневский лÿмеш национальный медицине шымлыме рÿдержын вÿргорно хирургий отделенийжым вуйлатыше Андрей Чупин.

«Ковид шÿм-вÿргорно системылан, эн ончычак вÿрын малыме системыжлан, кугу нелылыкым ышта, сандене тиде инфекцийым чытен лекше-влак коклаште вÿрчуҥга чер моткоч чÿчкыдын вашлиялтеш», – рашемден шанчызе.

Мутшо почеш, кидысе вÿргорнат, йолысат ик семын орланат.

Вÿрчуҥга неле ишемийланат вияҥаш амалым ышта. Тыгодым вÿр коштмо паша кенета пужла да чыла тиде кидым але йолым пÿчкын ойырымо дене мучашлалтын кертеш.

«У коронавирус инфекцийын пандемийже пагытыште тыгайже шагал огыл лийын», – палемден Чупин.

У коронавирус инфекцийым чытен лекме деч вара тромбозын лачшымак мыняр жап гыч вияҥмыжым каласаш неле. Тидыже чер дене кучедалме годымат, поснак неле пациент-влакын, паремме деч вара икмыняр тылзе гычат лийын кертеш. Лÿдыкшö моткоч кужу жаплан аралалт кодеш.

Айдеме мыняр нелын черланен, шодыштыжо пуалме да фиброзный вашталтыш-влак, тыгак вÿрчуҥга деч нелылык лийын кертме амалым ыштыше моло зиян тунар кужун аралалт кодыт.

Врачын эскерымыж гыч, лÿдыкшö тÿшкаште атеросклероз дене орланыше черле-влак улыт, а у коронавирус инфекций дене черланыме деч ончыч вÿргонышто эше операцийым ыштыме гын – поснак. Пациент куштылгырак формо дене черланен, мöҥгыштыжö эмлалтын, анализше-влак шодын чотшак огыл локтылалтмыжым, вÿрын нормышто улмыжым ончыктат гын, тромбоз дене черланен кертме шотышто утыжым тургыжланыдеат кертеш, но ситуацийым контрольышто кучашыже кÿлеш.

«Тыгеат лиеда: пациент ковидым сайын чытен лектеш, но вара, антикоагулянт але дезагрегант терапийым огеш эрте гын, вÿрчуҥга дене авалталтеш», – умылтарен А.Чупин.

                                                                                                                                                                                                  М.ИВАНОВА

Опубликовать в Одноклассники

Добавить комментарий