Россий ФСБ-н Марий Элысе управленийже Шоя-Кузнецовысо психоневрологический интернат вуйлатышын шке полномочийже дене утыждене пайдаланымым рашемден. Тидлан тудым судитленыт.
Шымлымаш ончыктен: вуйлатымыж жапыште тудо «Водоремсервис» ООО дене учрежденийлан пайдале огыл ойпидышым ыштен. Тидлан кӧра интернатлан 7,5 миллион теҥге эҥгек лийын.
Марий Элын Верховный судшо 9 февральыште кугыжаныш обвиненийын шонымашыж дене келшен. Тудым тыгак республикысе прокуратурат пеҥгыдемден. Тыге Шоя-Кузнецовысо психоневрологический интернатын ончычсо вуйлатышыжлан 50 тӱжем теҥге штрафым тӱлыкташ, вуйлатыме пашам шукташ права деч посна кодаш пунчалым лукмо. Приговор законный вийыш пурен. Тыгак титакан еҥ деч интернатлан ыштыме эҥгек кугыт оксам, 7,5 миллион теҥгем, кӱрын лукташ пунчалме, палдара Марий Элысе УФСБ-н пресс-службыжо.
