Еҥ-влак кузе-гына чояланаш огыт тырше?! Теве кодшо кечылаште 6-шо №-ан исправительный колонийын лӱдыкшыдымылык отдел жын пашаеҥже-влак ик тыгай ойыртемалтше сӱрет дене вашлиялтыныт.
Мо лийын? Ик ава эргыж дене икмыняр кече шуйнышаш вашлиймашыш толын да пеленже кок когыльым конден. Но ты отделын пашаеҥже-влаклан нуно путырак пеҥгыде улмышт дене «келшен огыл». Сандене, сайынрак шымлаш манын, пӱчкыныт да, очыни, шкештат чот ӧрыныт. Вет иктыжын кӧргыштыжӧ кок смартфон, весыштыже кок телефон да нунылан зарядный устройство лийыныт!
Мо оҥайже, когыльым нунын дене пырляк кӱэштыныт! Тидыжым сийын тичмаш улмыжо палдарен. Ӧрмаш, но ны смартфон, ны телефон-влак нимат лийын огытыл. Тергымеке, нунын пашам ыштымышт рашемын!
Тиде йокмам кондышо ӱдырамаш тыгай чояланымаш нерген паленат огыл манын ӱшандараш тыршен ойлен. Пуйто учрежденийыш когыльым палыдыме ӱдыр наҥгаяш йодын. Кеч-мо гынат, ынде ты ӱдырамашланак мутым кучашыже логалеш. Тудлан 3 гыч 5 тӱжем теҥге марте штрафым тӱлыктен кертыт. Тиддеч посна «пӧлекым» тӱрыс поген налыныт да эргыж дене вашлияш чареныт, палдара республикысе УФСИН-ын пресс-службыжо.
Л.Камалетдинова
А.Канатеевын фотожо