6 июньышто М.Шкетан лӱмеш Марий национальный драме театрыште Россий Федерацийын сулло артистше, Марий Элын калык артистше, Марий Эл Кугыжаныш премийын лауреатше Василий Домрачевын 60 ияш лӱмгечыжлан пӧлеклалтше усталык касше эртыш. Тудым юбиляр «Рвезылык эртыш – ыш чеверласе» манын лӱмден.
Пайрем касым «Салика» спектакль гыч ужаш дене почо. Ты спектакльыште Василий Валерианович Полат Акпайын рольжым мастарын модмыж дене кумылым нӧлтыш. Тиде постановкым режиссёр семын тудат сценыш луктын да эше тыгаяк лӱман кинофильмым войзен. Спектакльлан сӱан сценылан шӱвырзӧ-влак кӱлмӧ годым тудо театрын артистше-влакым ты семӱзгарым шокташ туныкташ шонен. Тидлан республикыштына кумдан палыме шӱвырзӧ Эчан Малининым театрыш ӱжын. Икмыняр артистым шӱвырым шокташ туныктен. Тылеч вара Сергей Данилов, Евгений Сергеев да Эдуард Яковлев (тӱмыр дене) шке ансамбльым чумыреныт. А 2006 ийыште изирак ты коллектив В.Домрачев дене пырля Словакийыште эртаралтше шӱвырзӧ-влакын тӱнямбал фестивальышкышт миен коштыныт.
В.Домрачев республикысе икмыняр театрыште режиссёр пашам шуктен. Калыкнан тӱҥ марий театрыштыже гына 25 постановкым сценыш луктын. Келге содержаниян, чоным коржтарыше спектакль-влакым шындымыже пайрем кечынат сайынак палдырныш. Нунын кокла гыч икмыняржын («Пысман корем», «Кайыккомбо кашта», «Йӧратымаш? Йӧратымаш! Йӧратымаш…», «Уло яллан ик Йогор», «Ава капитал») гыч ужашыжым артист-влак модын ончыктышт.
Усталык касыште икте почеш весе саламлымаш дене йогеныт. Эн ончычак мутым тӱвыра, савыктыш да калык-влакын пашашт шотышто министрын алмаштышыже Михаил Матвеев ден Культур пашаеҥ-влак профсоюз реском председатель Владимир Ушнурцев нальыч. Нуно уста актёрым, режиссёрым шочмо кечыж дене саламлышт да пашажым кӱкшын аклен, эшеат кугу сеҥымашке шуаш тыланышт. Тыгаяк саламлыме шомак Марий Элысе СТД лӱм дене Константин Шамшуров, республикысе театр, СМИ вуйлатыше, ГИТИС-ыште пырля тунемше, йолташыже-влак деч лийын. Мутат уке, пелашыже, эргыже да родо-тукымжо дене пырля аван каласыме шомакше – эн лишыл да шерге, эм гаяк кӱлешан.
Ты кастене пайремын озажым саламлаш кумдан палыме руш поэт Александр Пушкин эсогыл «толын» ыле! Тудо рушла возымо ятыр произведенийжым шарналтыш, но Йыван Кырлан «Шочмо кече» почеламутшо эн сайын сценыште йоҥгалте. «Уста актёр, сай кинорежиссёр… улат, но эше тылат поэт лийман!» – тыгайрак темлымаш лие тиде кечынак шочмо кечыжым «палемдыше Пушкин» деч. Артист – артистак тудо. Театрын тӱҥ режиссёржо Роман Алексеев ден вуйлатыше Эрик Юзыкайнын саламлымашышт моткоч вучыдымо да ойыртемалтше ыле.
Кугыжаныш Думын депутатше Сергей Казанков, республикын икымше президентше Владислав Зотин, Удмуртийын калык писательже АР-Серги да моло дечат телеграмме дене пурышо саламлымаш-влак юбилярым пагалымашым ончыктеныт.
Сцене гыч йоҥгышо кажне шомак Василий Домрачевын талантан, марий да Россий искусствым чапландарыше еҥ улмыж нерген палемденыт.
«60 ий – эн сай, илышын шолын шогымо пагытше» – тыге йоҥгалте ик саламлымашыште. Чынжымак, Василий Валерианович, ончыкыжымат у роль, у паша-влакым тендан деч вучаш тӱҥалына, вет тидлан тендан шинчымашдат, усталыкдат да вий-куатдан ситыше!
Алевтина БАЙКОВА
Фотом театрын сайтше гыч налме
