Марий Эл Радион хит-парадше
Йолташ-влак, тендан полшымо дене кодшо арняште мурызо-шамыч шке коклаштышт тыгайрак «тошкалтышым» чоҥеныт.
- Людмила Конакова – «Колышт тудын йӱкшым»
- Николай Изергин – «Чеверын код – эрла мартен»
- Геннадий Куклин, Лидия Сапаева – «Ош лумын вальсше»
- Кристина Краснова – «Авай»
- Александр Марков – «Тылат, пагалымем»
- Надежда Мокеева – «Окна яндам шупшале теле»
- Богдан Тымбаршев-Шой – «Сеҥымашын мурыжо»
- Алексей Милютин – «Йӧратем»
- Светлана Осипова, Татьяна Умурбаева – «Алло! Йолташ ӱдырем»
- Надежда Крылова – «Эргымлан»
Йӧратыме мурызыланда ончыл верым налашыже кузе полшышашым огыда пале гын, ушештарена: 5533 кӱчык номерыш SMS-ым колтыман. Тӱҥалтыште МАРИ мутым возыман, вара, яра верым кодыде, мурын номержым шындыман. Муро лӱмым кавычкыш налман огыл. Йӱклымаш SMS-ПОРТАЛ-ыште кая.
Кок йолташ ӱдыр
Светлана Осипова – Марий Элын калык артистше. Тудо Пошкырт кундем Калтаса район Ӱлыл Качмаш ялеш шочын-кушкын.
Татьяна Умурбаева Пошкырт кундем Илиш район Алач ял гыч.
Коктынат эстраде аланыш эртыше курымын 90-ше ийлаштыже толыныт. Ик жап нуно Я.Эшпай лӱмеш Марий кугыжаныш филармоний пеленысе «Мари» ансамбльын солистше лийыныт. Тунамак дуэт дене сценыш лекташ тӱҥалыныт. «Пален омыл», «Тумо, тумо» да моло мурым пырля муреныт. Трио денат (кумшыжо Виктор Комаров лийын) «Шернур пазар», «Агытан», «Толын мландышке кеҥеж» да эше шуко мурым темленыт.
Тунамсе жапым шарналтен, йолташ ӱдыр-влак уэш пырля калыкым куандараш шонен пыштеныт.
– Дуэт дене муро у семын йоҥгалтеш, садлан меат у мурынам калык ончыко у семын луктынна, – ойла мурызо Татьяна Умурбаева. – «Алло! Йолташ ӱдырем» мурылан мутым Зинаида Долгова возен, а семым Лилия Алексеева келыштарен. Муро икте-весым сагыныше кок йолташ ӱдырын телефон дене мутланымышт нерген.
Алевтина БАЙКОВА
Фотом еш альбом гыч налме.
