Шорык
Тиде арнян романтике шӱлышан вашлиймаш-влак лийыт, йолташда-шамыч дене пырля жапым веселан эртареда. Корныш але путешествийыш тарванеда гын, туштат чылажат шонымыда семын лиеш. Икманаш, тӱрлӧ событийлан поян арня вуча.
Презе
Кызыт тунар оксам ыштен налаш йӧн пуалтеш – шоҥгеммекыда шийвундо шотышто чӱдылыкым йӧршын палыде илен кертыда. Окса шукемме дене шукертсек шонен коштмо сатудам налыда. Ешлан, лишыл еҥ-шамычлан тӱткышым утларак ойырыман.
Йыгыр
Усталык пашам шуктеда гын, нине кечылаште кугу лектышыш да кӱкшытыш шуыда. Тиде арня контрактым, ойпидышым ышташ, мужыраҥаш келшыше лиеш. Шкет еҥ-шамыч у шӱмбелым вашлийын кертыт. Кеч-могай нелылыкым куштылгын сеҥеда.
Рак
Тӱрлӧ неле йодышым рашемдаш сай арня. Ешым чумырен, ойпидышым ыштен кертыда. Но чыла тидыже жапым пайдалын кучылт моштеда гын веле лиеш. Тыгак пӱсӧ ушакылда ден виян интуицийда шонымым илышыш пурташ полшат.
Лев
Кызыт вий-куатда кугу лиеш, сандене кеч-кӧм ӱшандарен кертыда. Паша верым вашталтынеда гын, тиде шонымашым илышыш нине кечылаште пурташ сайрак. Ешартыш оксам ыштен налаш йӧным кычалашат тиде пагыт утларак келшен толеш.
Ӱдыр
Арня лектышан лиеш. Паша гыч командировкыш колтен кертыт. Шкендам сай велым ончыкташ йӧн лектеш. Тӱҥжӧ – тидым ышташ лӱдман огыл. Еҥ-влак тыланда утларак тӱткышым ойыраш тӱҥалыт. Моло-влакын шонымашыштымат шотыш налаш тыршыза.
Виса
Коллеге-влакын полышыштлан эҥертен, улшо чыла неле йодышдам кызыт куштылгын рашемдеда. Кугурак должностьыш кусараш шке йодаш ида ӧрмалге. Тыге шийвундыда ешаралтеш. Тидлан лӱддымылыкда огеш сите гын, у пашам тӱҥал кертыда.
Скорпион
Улшо нелылык деч шылаш, тудым палыдымыла кояш ида тырше. Шкем ондалаш тыршаш нимолан. Лучо тидлан шукырак жапым ойырыза. Лишыл еҥда-влак нергенат мондыман огыл. Нунылан тӱткышда кызыт утларак кӱлеш лиеш.
Пикшызе
Тиде арня тыланда моткоч кугу пиалым конда. Но тылеч ончыч тӱрлӧ чарак гоч эрташ логалеш. Вуйлатышыда дене мутланаш шонеда гын, тидым лучо варарак ыштыза. Пелашдан иктаж койышыжо огеш келше гынат, тидлан верчын кугу тумам ида тарвате.
Ирказа
Тазалыкда начарем кертеш, сандене шекланыза. Икшывыда-влак дене шкендам тыматлын кучыза. Паша гыч луктын колтен кертыт, но тидын шотышто утыжым ида тургыжлане – ончыкыжым чонланда чотрак келшышым муыда.
Вӱд йоктарыше
Тиде арнян нимогай кугу событий огеш лий. Вуйлатыше, коллеге-влак дене вашкылым саемдаш келшыше жап. У проектым тӱҥалаш огеш темлалт. Тыгак тудым шагал палыме еҥ-влак дене пырля илышыш пуртыман огыл. Вучыдымо пӧлекым ыштен кертыт.
Кол
Нине кечылаште кокытеланымашым лукшо нимогай пашашке ушныман огыл. Тӱрлӧ ойпидышым ышташ, кугу сатум налаш огеш темлалт. Коллективышкыда у еҥ-влак ушнат, очыни. Тидлан кӧра пашалан шукырак жапым ойыраш тӱҥалыда.
Ӱпым пӱчкаш тарваненда гын
5 август. Таче ӱпым пӱчкаш келшыше кече огыл, уке гын окса шотышто нелылык лектын кертеш. Тудым кораҥдаш ӱпым оттеночный бальзам але пенке дене чиялтыме полша.
6 август. Ӱпым пӱчмылан кӧра роскотыш пуреда. Ӱпым натуральный чия дене чиялтеда гын, карьер тошкалтыш дене кӱзен кертыда.
7 август. Тиде кечын ӱпым пӱчманат, чиялтыманат огыл, уке гын вуйушдам уда шонымаш-влак авалтен кертыт.
8 август. Ӱпым пӱчкыда гын, оксада ешаралтеш, иктаж кугу сатум налыда. Ӱпым ошалге тӱсыш гына чиялташ темлалтеш.
9 август. Ӱпым пӱчмӧ уда деч утлаш, тазалыкым пеҥгыдемдаш полша. Ӱпым чиялтеда гын, коллективыште вурседылмаш тарванен кертеш.
10 август. Ӱпым пӱчкаш келшыше кече огыл, молан манаш гын илышыштыда иктаж-мо уда лиеш. Ӱпым пӱртӱс чия дене чиялтеда гын, чапда кушкеш.
11 август. Ӱпым пӱчмӧ уш-акылым вияҥдаш, интуицийым пӱсемдаш полша. Ӱпым шӧртнялге тӱсыш чиялтеда гын, шийвундыда ешаралтеш.
Л.Камалетдинова
