Туныктышо йочалан шинчымашыш кугорным почеш. Тудо тунемме пагытлан икшывылан кокымшо аваш, ачаш савырна. Йошкар-Оласе 2-шо №-ан школышто директорын воспитаний паша шотышто алмаштышыже, марий йылмым туныктышо Татьяна Гребневалан нине шомак-влак лач келшен толыт.
Татьяна Николаевна — Марий Турек район Арбор кундемысе Кукрем ялын ӱдыржӧ. Марий кугыжаныш пединститутым тунем лекмыж деч вара 2-шо №-ан школышто туныкташ тӱналын да таче марте туштак тырша.
— Тыште ынде 25 ий туныктем. Мый марий йылмым туныктышо семын толынам да кызытат ты пашам наҥгаем. Индешымше ий директорын алмаштышыже улам, — мане Т.Гребнева.
Рӱдоласе ты школышто марий йылмым кугыжаныш йылме семын 1991 ийыште туныкташ тӱҥалыныт. Ты пашалан негызым школ директор П.Новосёлов пыштен. Тунам марий йылмым ик классыште гына туныктеныт. Тушко марий шӱлышан ача-ава-влакын икшывыштым чумыреныт. Марий йылме урок арнялан кум гана лийын. Варажым кугыжаныш марий йылмым 1-9 класслаште 2010 ий марте туныктеныт. Урок арнялан кок ган лийын. Кызыт кугыжаныш марий йылмым 5 гыч 9-ше класс марте арняште ик гана туныктат. Тӱҥалтыш класслаште, ФГОС дене келшышын, ты урок расписанийыште уке.
— Кызыт марий йылме дене урокым школыштына мый гына эртарем. Мо оҥайже, 25 ий жапыште вес калык гыч лекше икшыве, ача-авашт деч «марий йылме молан кӱлеш, тудым тунемаш огеш кӱл» манмым ик ганат колын омыл. Поснак порын пашам ышташ тӱҥалме пагытем шарналтеш. Тунам вер ситыдымылан кӧра марий классыш руш йоча тунемаш толын. Вес классыш кусаралтын огыл, тудлан марий йылме урок келшен, эсогыл ик жап гыч марла умылаш, мутланаш тӱҥалын. Нине икшыве-шамыч дене тудо пагытыште ятыр марий мероприятийым эртарыме. Кызыт чон коржеш. Мемнан дене изирак класслаште марла яндарын мутланен моштышо йочажым от вашлий манаш лиеш, сандене нунын дене, 5-ше классыш вончымекышт, пашам ышташ нелырак. Туге гынат ӱдыр-рвезе-влак тунем шуыт. Икмыняр жап гыч марла саламлалтмышт, марла вашештымышт, муралтен колтымышт куандара. Тугеже тыршымем арам лийын огыл манын умылет, — каласыш директорын алмаштышыже.
Татьяна Гребнева нелылыкыш логалше еш гыч лекше тунемше-влак денат пашам ышта. Тыгай йоча дене кылым тудо эреак муаш тырша, подылаш йӧратыше ача-авашт дене мутлана, мӧнгышкышкат коштеш.
Кумданрак — «Марий Эл» газетын
2017 ий 3 октябрьыште лекше номерыштыже лудын кертыда.
Лидия ШАБДАРОВА.
М.Скобелевын фотожо.
«Марий Эл» газет редакций лӱм дене Марий Элын туныктышыжо-влакым профессионал пайремышт дене саламлена. Пеҥгыде тазалыкым, пиалым, пашаштышт кугу сеҥымашым тыланена.
