Россий Федераций Просвещений министр Сергей Кравцов Шинчымаш кече вашеш пуымо эртыше ача-ава-влакын Россий кӱкшытан IX погынымашышт палемден: санитарно-эпидемиологический правил дене келшышын, школлаште эртыше уроклаште мобильный телефоным кучылташ ок лий.
«Тудын дене йоча йыҥгырташ, мутланаш гына пайдаланышаш», — каласен тудо.
2021 ий 1 январь гыч воспитанийым да шинчымашым пуышо, тыгак йоча-влакын тазалыкыштым пеҥгыдемдыше организаций-влаклан тидын шотышто йодмаш вийым налеш. Тудын дене келшышын, «тунеммаште мобильный средствам кучылташ ок лий». Молан? Тудын экранже, компьютер але планшет дене таҥастарымаште, ятырлан изи, сандене шинча начарын ужаш тӱҥалеш, тыгак йочан тупрӱдыжӧ кадырга. У санитарный правил почеш, интерактивный досканат диагональже 165,1 см деч изи лийшаш огыл, компъютерын але ноутбукын мониторжо – 39,6 см, планшетын – 26,5 см.
Г.Кожевникова
Фотом Марий Эл Образований да науко министерстве гыч налме
