Коло тӱжемым эртыме
Марий Элыште тиде кечылаште тӱшка ден фермер озанлыклаште кокла шот дене 540 утла тонн шӧрым лӱштат. Тидыже кодшо ийысе тыгаяк жапысе деч 62 тоннлан шукырак.
Ялозанлык да кочкыш сату министерстве гыч пурышо увер почеш, 8 июльышто Медведево районысо озанлык-влак чылаже 176,2 тонн шӧрым лӱштеныт. Тидыже республикыште эн шуко. У Торъял районышто 81,4 тонным шупшылыныт, Морко районышто – 52,2 тонным.
Кажне ушкаллан шотлымаште тиде кечылаште республикыште 26,8 килограмм дене, але кодшо ийысе тыгаяк жапысе дене таҥастарымаште кок килограммлан шукырак, лӱштат. Тидыже эн ончычак вольык ашныме технологийым уэмден толмылан, кӱтӱм саемдымылан да сайынрак пукшаш тӱҥалмылан кӧра лийын. У Торъял район ик ушкаллан шотлымаште эн шуко шӧрым лӱшта – 33,4 килограммым, Медведево район – 32,4, Шернур район – 28,5 килограммым. Тыгодымак Звенигово районышто улыжат 14,8 килограмм дене гына шупшылыт.
Республикысе тӱшка ден фермер озанлыклаште ынде ушкал кӱтӱ 20 тӱжем вуйым эртен. Тыгай кӱкшытыш ятыр жап лишемме. Кызыт 20289 вуй шотлалтеш. Тидыже кодшо ийысе деч 803 вуйлан шукырак. Эн шукылан, 268 ушкаллан, Морко районышто ешаралтын. Тыште «Звениговский» СПК вольыкым шукемден толеш. Кызыт эн шуко, 5433 ушкал, Медведево районышто, эн шагал, 651 вуй, Звенигово районышто.
Ял калыкын шке вӱташте ашныме ушкал умбакыже шагалем толеш. Тидлан кӧра уто шӧрым кодшо ийысе деч эсогыл 560 тоннлан шагалрак погымо. Мутлан, эн шуко уто шӧрым (тений идалык тӱҥалтыш гыч 1202 тонным налме) погышо Морко районышто кодшо ийысе деч 305 тоннлан шагал налыныт.
