Марий тиште кечылан пӧлеклалтше торжественный пайрем годым кугу суапым ыштыше ятыр чолга марий шӱлышан еҥым Марий Элын 100 ияш лӱмгечыжлан пӧлеклалтше «Калык верч тыршымаш» Петров Иван Петрович. 1893-1938» шарнымаш медаль дене палемдышт. Нунын коклаште иктыже Кужэҥер районысо Ӱштымбал ял гыч Николай Золотарёват лийын.
Тудо 46 ий наре верысе школышто марий йылме ден литературым туныктен. РФ образованийын почётный пашаеҥже, Марий Эл Республикын сулло туныктышыжо Российын эн сай туныктышыжо семын Президент грант денат палемдалтын. Пелашыж дене коктын 46 ий еш дене илымыжлан «За любовь и верность» медаль денат палемдалтын. Ты шотыштак каласаш гын, нуно коктын вич икшывым ончен куштеныт, чылаштлан кӱшыл шинчымашым пуэныт. Кажыныже туныктышо пашалан тунем лектын гынат, кызыт тӱрлӧ вес направлений дене тырша. Но тунемшыже-влак кокла гыч школышто ыштышыже шукын улыт.
Ме тудым эше йоча-влакым Марий Эл мучко велосипед ден коштмо турым эртарыше семынат палена. Кызыт полышкалышыже укелан кӧра ты пашам чарен. Поэзийланат шӱман. «Ӱшӱт ӱмбалне ӱжара» книгаже лектын. Кызыт Николай Александрович сулен налме канышыште гынат, марий мер илышысе тӱрлӧ мероприятийыш ушненак шога.
С.НОСОВА
Авторын фотожо
