УВЕР ЙОГЫН

Марий рвезе тӱнямбалне ойыртемалтын

14-19 октябрьыште Объединенный Араб Эмиратыште, Абу-Даби олаште, паша профессий-влакын «WorldSkills International – 2017»  тӱнямбал чемпионатше эртен. Марий Эл гыч тушко Йошкар-Оласе строительный техникумын тунемшыже Павел Казанцев миен. Рвезе «Кермычым оптымаш» номинацийыште усталыкшым ончыктен. Тудо чемпионатыште чыла заданийым сайын ыштен, сандене Профессионализмлан медальон дене палемдалтын. 

26 октябрьыште Павелым кӱртньыгорно вокзалыште талешке семын вашлийыныт. Тудым саламлаш Марий Элын Образований да науко министрже Н.Адамова, тудын алмаштышыже Э.Идиатуллина, Йошкар-Оласе строительный техникумын директоржо Л.Коровина, Чоҥымо, илыме да коммунал озанлык министерствын, Марий Эл Республикысе чонышо-влакын гилдийышт ден ушемыштын еҥже-шамыч  миеныт. Тыгак рӱдоласе сервисный технологий-влак техникумын барабанщицыже-шамыч тудлан  весела маршым шоктеныт, йолташыже, пырля тунемшыже-влак шке ямдылыме тамле тортым кучыктеныт.

П.Казанцев чылаштлан тауштен, таҥасымаште шкенжым кузе ончыктымыж дене палдарен, Росссийын да Марий Элын чапшым аралаш тыршымыж нерген каласкален.

Тӱнямбал чемпионатыш 58 эл гыч 1251 ӱдыр-рвезе чумырген. Российын чапшым 52 компетенцийыште 58 участник арален. Элна ты чемпионатыште общекомандный зачетышто икымше верыш лектын, а медальныйыште визымше лийын. Чылаже мемнан самырык профессионална-шамыч   6 шӧртньӧ, 4 ший, 1 бронзо медальым, 21 медальоным сеҥен налыныт.

Торжественный ужаш ты кечынак Йошкар-Олаште самырык-влакын полатыштышт шуйнен. Тушто Павел Казанцевым калык ончылно саламленыт. Тыгак Марий Эл Главан стипендиатше-влакым палемденыт. Тений республик вуйлатышын стипендийжым 59 ӱдыр-рвезе налаш тӱҥалеш. Нунын кокла гыч 27-ше ссузлаште, 22-шо вузлаште бакалавр, специалитет, магистр программе почеш, 9-же аспирантурышто, 1-ше ешартыш общеобразовательный программе почеш тунемыт.

Стипендийын кугытшо тынаре:

  • ссузлаште, ешартыш образовательный программе дене тунемшылан – 1600 теҥге,
  • вузын студентшылан – 2400 теҥге,
  • аспирантлан – 3000 теҥге.

Марий Эл Республик вуйлатышын стипендиатше лияш «5» отметке 50 процент деч шагал огыл лийшаш. Тыгак ӱдыр-рвезе-шамыч республикысе, всероссийский, тӱнямбал олимпиадылаште, конкурслаште шкеныштым сайын ончыктышаш улыт. Аспирант-шамычын иктаж авторский изобретенийыштым, шымлыме статьяштым, эскперимент пашаш ушнымыштым ончат. Тидым эртыше тунемме идалыкым ончен аклат.

Л.ШАБДАРОВА.
М.Скобелевын фотожо.

Опубликовать в Одноклассники

Добавить комментарий