Морко район Унчо селасе книгагудышто «Мои документы» шуко функциян рӱдер верланен. Тудо 2015 ий 25 декабрьыште почылтын. Икымше кече гычак тыште документоведлан Светлана Тихомирова ышта. Тудын дене мутым вашталтышна:
– МФЦ кугыжаныш полышым пуышо порталлан шотлалтеш, теве ончалза, ме калыклан 150 тӱрлӧ услугым пуэн кертына, – кидшым услуго-влакым рат дене возыман кагаз велыш шуялтыш. – Тылзе еда тӱлыман йоча пособийлан кагазым ямдылена: йодын толшо еҥ (заявитель) мыланем йодмашым воза, мый кӱлеш кагаз-влакым ямдылем, компьютер обработкым ыштем да чумыр пакетым соцполыш адрес дене колтем. Но тӱҥ шотышто госуслуго порталыште личный кабинетым почаш полшем, вара еҥ-влак шкешт йодмашым возен колтен кертыт. Заявитель дене пашам ышташ лӱмын моноблок уло, пенсионный, налоговый фондлашке документ-влакым колтена. Але теве машина регистрацийлан ГИБДД-н черетышкыже возалтыт, кӱлеш верыш оксам тӱлена – икманаш, мом йодын толыт, тудым ыштем.
– Поснак шоҥго-влак куаненыт дыр…
– Нуно шукышт кызыт накопительный пенсийыштым налыт. Архив гыч иктаж справке кӱлеш – йодмашым возат, вет нунын пашам ыштыме ятыр организаций, учреждений пытеныт, сандене Марий Элын рӱдӧ, Морко район архивлашке лекташ перна. Пенсийым уэш шотлен палемдыме, перерасчёт, годым пеш шукын коштыч, черетат лиеда ыле.
– Тугеже ондакысыла, справкым кычалын, Моркыш я Йошкар-Олаш кошташ ок кӱл.
– Калыклан пеш йӧнан. Кызыт шукын росреестрыш пӧртлан документым сдатлат, ондак тыгай услугына уке ыле. Эре тышке коштшыжо «Ой, йӧра тый улат» манеш.
– Паша пеш шукыс. Шуктет?
– Чыла ыштен шукташат ок лий. Теве программе вашталтын, тидлан тунемман. 2016 ий гыч тичмаш ставке дене пашам ыштенам, ӱмаште 20 сентябрь гыч пел кечашыш кусарышт, сандене жап ок сите. Пашам 8 шагатлан тӱҥалам. Республикысе МФЦ дирекций дене сеть дене кылдалтше улына, ик-вич минутлан вараш кодат гынат, кычалаш тӱҥалыт. Ондак каяш, вараш кодаш ок лий.
– Тый Шлань ялыште илем маньыч…
– Да, кок меҥге лиеш. Кеҥежым велосипед дене кудалыштам, а телым то йолын, то автобс дене – кузе лектеш, туге коштам. Нимат огыл, «Ушкал дене кынелына, ушкал дене малаш возына» манын воштылына ялыште илыше-влак.
Л.СЕМЕНОВА
