5 февральыште Курыкмарий кундемын эргыже, палыме учёный, историй науко доктор Ксенофонт Сануковын шочмыжлан 90 ий темын.
Ты кечын Марий Эл Кугыжаныш Погынын председательже Михаил Васютин ден бюджет да экономике политике шотышто комитетын председательже, МарГУ-н ректоржо Михаил Швецов тудым шарныме лӱмеш мемориал оҥа ончыко пеледышым пыштеныт.
Ксенофонт Сануков — Россий академийын академикше, Россий Федерацийысе кӱшыл школын сулло пашаеҥже, Марий АССР наукын сулло деятельже, Марий Эл Кугыжаныш премийын лауреатше, Йошкар-Олан да Курыкмарий районын почётан гражданинже, Марий кугыжаныш университетын почётан профессоржо. Тудын, шӱдӧ наре научный пашан авторжын, вуйлатымыж почеш «Марий-влак» историко-этнографический очерк, «Марий литературын историйже», «Калыкын трагедийже. Марий Эл Республикыште политический репрессийыш логалше-влакын Шарнымаш книгашт» савыкталтыныт. Тыгак учёныйын кумдан палыме землякше-влак нерген биографий пашаже-шамыч кӱкшын аклалтыт.
Ксенофонт Никаноровичын шочмо кечынже тудын ончычсо коллегыже, йолташыже, тунемшыже-влак талантан профессорын илыме пӧртшӧ (Вашский урем, 7-ше пӧрт) воктене вашлийыныт да тудым порын шарналтеныт.
Галина Кожевникова
Фотом Марий Эл Кугыжаныш Погынын сайтше гыч налме
