Марий Элын студентше – Россий автогонкын чемпионжо
Юл кундем кугыжаныш технологий университетын Йошкар-Оласе аграрный колледжыштыже тунемше Николай Калинин Россий автогонкын чемпионжо!
17 ияш эрге Автовазын автомобильжым виктарыме шотышто идалыкын эн сай пилотшо семын палемдалтын, тудлан лачак шочмо кечыже вашеш предприятий автомобильым пӧлеклен.
Николай колледжыште «Автомобильын двигательжым, системыжым да агрегатшым олмыктымаш да обслуживатлымаш» специальность дене тунемеш. Йот элласе автомашинам огеш йӧрате, тудлан шкенан элыште ыштен лукмо-влак келшат. Келшат веле огыл – ончыкыжым рвезе Lada Kalina Sport маркан сай качестван автомобильым погынеже да Йошкар-Ола мучко лач тудын дене кудалыштнеже.
Рвезе Россий кӱкшытан таҥасымашлаште ик гана веле огыл призёр лийын. 2024 ий шошым ий ӱмбалне автомашина дене кудалыштме дене элнан Кубокшым сеҥен налын. «Ока» маркан икымше спорт автомобильым ачаже Николайлан куд ияш улмыж годымак пӧлеклен. Каласыман, тудыжым лӱмынак погеныт да таҥасымашыш каеныт, но изи ийготшылан кӧра рвезым тушко пуртен огытыл. Туге гынат шым ияш улмыж годым тудо тиде «Ока»-м Крутой Овраг ял кундемыште эртыше таҥасымашыште терген ончен.
«Иномарке-шамыч дене таҥасаш неле, но кӱлеш семын виктарыме да опытна полшат. Картинг школынат пайдаже уло. Кудалме годым еҥ-влак ласка огытыл. Но кунам тый чын шӱлаш, шкем кидыште кучаш, тургыжланаш огыл тунемат, тунам йоҥылышым шагал ыштет», – ойла Николай.
Кызыт рвезе «Российская серия кольцевых гонок» таҥасымаште моштымашым ончыкта. Тудо Российыште эртаралтше ик эн чапланыше автотаҥасымашлан шотлалтеш. Тудо тӱрлӧ олалаште – Москваште, Озаҥыште, Сочиште, Смоленскыште, Грозныйышто – эртаралтеш.
Г.Кожевникова
Фотом Юл кундем кугыжаныш технологий университетын сайтше гыч налме