У ий салам: У Торъял район
Шергакан марий калык, районысо пошкудо-влак!
Эртен кодшо ий мыланна шке ешыштына кажне лишыл еҥым аралаш да аклаш, илышнам вес могыр гыч ончалаш таратен. Еш – кеч-могай айдемылан эн тӱҥ эҥертыш, пиал да куат.
Ялозанлык пашаште сайжат, осалжат ятырак лийыныт: май юалге, кеҥеж кукшо, сентябрь шокшо шогышт. Туге гынат пареҥге лектыш лийын, погалтын. Кызыт ялозанлык продукцийлан ак куандара.
Ме, тошто ийым порын ужатен, у ийыш ӱшан дене вончена! Тек у ий тӱняште тыныслык дене кылдалтеш. Тек мемнан вуй ӱмбалне эре яндар канде кава лиеш, тек шучко сар пыта.
Ий гыч ийыш мемнан пасушто тыршыше пашаеҥ-влаклан кугу таум каласем. Тиде агроном, тракторист ден механик-влаклан, ТоштоТоръял, У Торъял, Кугу Нурмо, Кугу Лумарий, Агытансола, Кузнеч, Тошто Крешын, Кужнур, Лужала гычын пареҥгым погаш толшо да грузчик-влаклан. Кид-йолда лывырге, кап-кылда куштылго, илыш-корныда кужу лийышт. Пашада ушнен толжо, эреак парышан лийже.
2025 ийыште уло марий калыклан пеҥгыде тазалыкым, кужу ӱмырым, волгыдо илышым, яндар шӱм-чоным, мотор илышым тыланем. Эреак умылымаш, ваш пагалымаш да чон ласкалык лийышт!
Наталья ИВАНОВА,
сулло фермер
ТоштоТоръял
Юрий ИСАКОВ ямдылен
Альбом гыч налме фото
