Кечышот ден калык пале:
21ноябрь – Шыже пазар
Марий кумалтышын чинче тушыжо:
«Кече Юмо, шке волгыдет дене чыла вийым помыжалтарыметлан, тул вий дене айдеме чоным ылыжтыметлан, чыла кушкыл ден янлыклан ӱнарым пуыметлан, шемрокысо туто пырчым шокшо кечыйолет дене ырыктыметлан, неле покшым, неле лупс деч аралыметлан, кум тӱрлӧ вольыкнам нӧнчык лавыра, йӱр деч аралыметлан, мландым, вӱдым, южым, вольыкым, кушкылым, изижымат-кугужымат, рвезыжымат-шоҥгыжымат иктӧр ырыктыметлан пеш кугу тау. Кече гыч кечыш илышнам уэмден, ылыжтен шого, осал вийым когартен шого, чон кӧргӧ шижмашнам арум ыштен полшен шого, арым тӱрлӧ осал койыш деч аралаш полшо…»
«Марий сугынь» книга гыч налме, 2005 ий.
Черке йӱла почеш:
18ноябрь – Святой Ион Новгородский ден святой Тихон Московскийын кечышт.
19 ноябрь – Преподобный Варлаам Хутынскийын кечыже. Ты кечын вӱдым ий ковыжла. А лум лумеш гын, телат луман лиеш, ойленыт.
20 ноябрь – Федотын кечыже.
21 ноябрь – Архистратиг Михаил ден Пылпомышысо капдыме Куат-влакын погынышт. Сернур селасе, Курыкмарий районысо Новая Слобода селасе да ракетный дивизийысе храм-влакын пайремышт.
22 ноябрь – Юмын Аван «Вашке Колыштшо» (Скоропослушница) юмоҥажын кечыже. Матрёнан кечыже. Теле тӱҥалеш, йӱштӧ толеш. Ты кечын сай игече шога – эше кум арня тыгаяк лиеш.
24 ноябрь – Федорын кечыже. Ты кечын каваште шӱдыр шуко гын, вес кеҥежым шуко емыж, саска лийыт. Калык пале шукталтше манын, кажне суртышто коштымо модо, снеге, эҥыж дене чайым шолтеныт.
Марий мландысе священномученик Адриан ден Михаил пресвитер- влаклан кондак:
«Толза, чын ӱшаныше-влак, ушан волгалтарыше-влакым моктена, Адриан ден Михаил священномученик-влакым кугу йӱк дене моктен мурена. Вет нуно уш пычкемышалтше да Юмо деч кораҥ илыме жапыште, вӱрым йӧсланен йоктарен, Марий мландым мушкыныт да тыге яндар вургем дене сӧрастаралтыныт, да мемнан верч Айдемым Йӧратыше Ик Юмым сӧрвален, кызытат Святой Троице ончылно шогат».
«Марла молитва-влак» книга гыч налме, 2005 ий.
Шарнаш кодшо ой:
Осал кышам от тошко гын, осалыш от шу.
Нужголым ияш огыт туныкто.
Мӱшкырет шужа гын, коҥгамбачат волет.
Еҥ мыскылыше шке лавырашыжак амырга.
Мундыра пӧрдеш, мучаш лектеш.
Арам моктен, еҥым веле пужет.
Кӧ мландым шымата, тудым мланде чамана.
Каласыме шомакым уэш поген налаш ок лий.
А.Е.Китиковын «Калыкмут» книгаж гыч налме, 1991 ий.
Ӱмырым илен эртарышын каҥашыже:
«Кӧ тендан йолчиемым чиен ончен огыл, тудын шнурокшым кузе кылдышашым туныктышаш огыл».
«Ончыч шонымашетым шотыш кондо, тунам тӱнямат вес шинча дене ончалат».
Светлана Носова ямдылен
Снимкыште: Йошкар-Оласе Марий паркын ик лукыштыжо.
Авторын фотожо
