Шукерте огыл Йошкар-Ола да Марий митрополит Иоанн журналист-влаклан вашлиймашым эртарен.
Поро йӱлаш пурышо Тений вашлиймашыже Благовещенский кафедральный соборын трапезныйштыже эртен. Архипастырь дене официально огыл, а тыглай гына вашлияш, мутым вашталташ, тургыжландарыше йодышлан вашутым налаш поснак куанле. Митрополит – моткоч кумда тӱняшинчаончалтышан айдеме. Кажне ойсавыртышыже, вашмутшо шонкалаш тарата, чоныш ласкалакым пурта да шкем юмынйӱла почеш илаш кумылаҥда. Тыгай вашлиймаш гоч тудым шкенжымат, тыглай илышыште мо дене илымыжымат сайрак пален налат. Ты гана тудо калык палым сайын палымыже, поҥгым погаш моткоч йӧратымыж дене ӧрыктарыш.
Митрополит погынышо-влаклан чонышто Рошто ден святочный кече-влакын волгыдылыкыштым арален кодаш тыланен. Кум шагат наре шуйнышо вашлиймаште тӱрлӧ йодыш тарваталтын: лишыл еҥ-влак деке йӧратымаш лийшаш, йоча-влакым авапомышыш гычак кӱлеш семын ончен куштымо, айдемын кумылжым нӧлтен кертше тачысе сымыктыш, музыко, сылнымут, увер технологий нерген… Владыка журналист-шамычлан интернет ден соцеть-влакын кулышкыжо ида савырне манын тыланен. Кызыт СВО кайыме жапыште чылалан тыныс илыш нерген соборный молитвыш ушнаш кӱлмӧ нергенат ушештарен. А тидлан эн ончыч кажныжын чоныштыжо тыныс лийшаш.
Мучашлан архипастырь журналист-влаклан шке возымаштышт, ойлымаштышт тӱтко лияш йодын, вет шомакын вийже уло, тудын дене весым сусыраташат, поро пашаланат ылыжташ лиеш. «Чыла статьяда, передачыда тек волгыдо, калыклан куаным кондышо лийыт. Шкежат тыге илаш тыршыза, тидын годым ушда шижмашдам эре эскерыже, да намыс ынже лий», – тыланен Иоанн.
Светлана Носова
Снимкыште: Марий книга савыктыш директор Эдуард Иманаев митрополитлан пеледышым кучыкта.
Виктория Соловьёван фотожо.
