19 август гыч 19 сентябрь марте Марий Элыште йоча-влаклан Лӱдыкшыдымылык месячник эрта. Тудын кышкарыштыже республикысе тунемме тӧнежласе, верысе кучемласе да Марий Элыште Россий МЧС-ыште тыршыше пашаеҥ-влак самырык тукым дене умылтарыме пашам эртарат. Мероприятий-влак пожар лӱдыкшдымылык, корнышто эҥгекыш логалме, терроризм деч аралалтме дене кылдалтыныт.
Месячник кышкарыште эртыше арнян Оршанке районысо Кугу Ӧрша школышто Оршанке посёлкысо 18-ше №-ан пожар-утарыше частьшын боецше-шамыч лийыныт. Нуно йоча-влаклан эвакуаций дене кылдалтше тренировкым, пожар годым шкем кучымо дене палдарыше инструктажым эртареныт. Тидын деч посна специальный пожар техникым, снаряженийым да оборудованийым ончыктеныт. Пожарым йӧртышӧ-влак тыгак шке службышт нерген каласкаленыт да туге, эсогыл йоча-влак кокла гыч икмынярышт ончыкыжым пожарный лияш кумылым ончыктеныт.
Г.Кожевникова
Фотом Оршанке районысо образований пӧлкан сайтше гыч налме
