Марий Эл Образований да науко министерствын увертарымыж почеш, черетан 2022-2023 тунемме идалыкыште Марий Элыште чылаже 250 образовательный организаций уэш шке омсажым почеш. Тений парт коклаш чылаже 85 тӱжем тунемше шинчеш, нунын кокла гыч 2,5 тӱжем ӱдыр-рвезыже – илышыштышт икымше гана. Каласыман, оласе южо школышто 10-12 икымше классат улыт, кажныштыже – 30 наре еҥ. Молгунамсе семынак туныктышо-влак огыт сите, поснак шуко нуно тӱҥалтыш класслаш кӱлыт.
Тений гыч чыла общеобразовательный организацийыште «Кӱлешан нерген мутланымаш» класс деч ӧрдыжсӧ занятий эртаралташ тӱҥалеш. Нуно могай темылан пӧлеклалтыт – чылажымат палемдыме. Сентябрьыште, мутлан, нуно Шинчымаш кече, Российын историйже, кумдан палыме учёный Константин Циолковскийын шочмыжлан 135 ий темме, Илалше-влакын кечышт дене кылдалтше лийыт. Тидымат ушештарена: тений гыч Российын чыла школыштыжо тунемме арня кугыжаныш гимным йоҥгалтарыме да флагым нӧлталме гыч тӱҥалеш.
Г.Кожевникова.
Снимкыште: Йошкар-Оласе А.С.Пушкин лӱмеш 4-ше №-ан гимназийын икымше классше.
Д.Речкинын фотожо
