Гороскоп

4-10 апрельлан гороскоп

 

Шорык

Тиде арня тӱрлӧ сатум налаш келшыше лиеш. Поснак – сӧрастарышым, мотор да модный вургемым, сымыктыш дене кылдалтше арвер ден ӱзгарым. Вӱргече гыч тӱҥалын рушарня марте палыме, пошкудо, родо-шамыч дене кыл локтылалт кертеш.

Презе

Ончыкыжым мом да кузе ыштышаш шотышто сайын шоналташ манын, ты пагытыште утларак жапым шкет эртараш темлалтеш. Кӧлан полыш кӱлеш гын, тореш ида лий. Арнян кокымшо пелыштыже окса йодыш утларак тургыжландараш тӱҥалеш.

Йыгыр

Кеч-мом ыштымыда годымат утларак эрыкан лиймыда шуаш тӱҥалеш. Но чыланжак тидым умылен огыт вашлий. Эсогыл чаракымат ыштен кертыт. Сандене шке кӧргӧ йӱкдам тӱткынрак колышташ тыршыза. Ешыштат, пашаштат кыл локтылалтме лӱдыкшӧ уло.

Рак

Шочмын да кушкыжмын шукертсек шонымыда шукталтеш, очыни. Мутлан, пашаште кугу премийым вучыдымын пуэн кертыт. Але иктаж-кӧ чонлан келшыше пӧлекым кучыкта. Лотерей билетым налын ончыза: туштат пиал шыргыжалеш докан.

Лев

Тиде арня тунемаш келшыше лиеш. Шукырак шинчымашым налаш кумыл лектеш. Пашаште чапда кушкеш. Вӱргече гыч ала-могай событий-влак лиедаш тӱҥалыт. Тидлан кӧра южо шонымашым вашталташ логал кертеш. Йолташ-шамыч дене кыл локтылалтеш, очыни.

Ӱдыр

Юридический йодышым рашемдаш логалеш. Тора корныш каяш, турист семын иктаж-кушко миен толаш келшыше жап. Ушкалымылан да ӱшаныдымылан кӧра йӧратыме еҥда дене кыл локтылалт кертеш. Эн неле кече-влак шуматкече да рушарня лийыт.

Виса

Ешан улыда гын, тудын сай велжым тиде арнян сайынак умыледа. Молан манаш гын, лач пелашдан полшымыж да тыршымыж дене шийвундо ешаралтмым шижыда. Тидыже шукертсек шонымыдам налаш йӧным ышта. Черланыме деч шекланыза.

Скорпион

Ты арнян мӧҥгыштӧ ачалыме, тӧрлатыме, иктаж-мом уэмдыме, шотыш кондымо, эрыктыме пашам чылан иквереш ыштен кертыда. Йӧратыме еҥым ушкалымылан кӧра коклаштыда умылыдымаш лектеш, очыни. Сандене тудлан лучо шукырак тӱткышым ойырыза.

Пикшызе

Усталык дене кылдалтше пашам шукташ келшыше арня лиеш. Ушыштыда ятыр оҥай шонымаш шочеш. Икшывыда уло гын, тудым иктаж-могай пашалан туныктыза. Арня покшелне шӱмбел дене умылыдымаш лектын кертеш. Эн неле кече-влак шуматкече да рушарня лийыт.

Ирказа

Тыланда шӱдыр-влак ешлан шукырак жапым ойыраш кӱлмӧ нерген ойлат. Ача-авада, родыда-влак дене тӱткырак лияш тыршыза. Вӱргече гыч рушарня марте тазалыкым поснак чот эскерыман. Уке гын иммунитет лушкымылан кӧра тудо начарем кертеш.

Вӱд йоктарыше

Кӧ дене сыренда улмаш гын, кызыт сӧрасаш йӧн лектеш. Иктаж-кушко миен толаш, еш дене пырля каналташ келшыше жап. Тыге те вий-куат утларак  ешаралтмым шижыда. Арнян кокымшо пелыштыже йӧратыме еҥ дене шымарак да тыматлырак лияш темлалтеш.

Кол

Те шуко у еҥ дене палыме лийыда. Ончыкыжым нуно тыланда чотак полшен кертыт. Шкет улыда гын, мӧҥгыштӧ шагалрак шинчаш, еҥ коклашке утларак лекташ, йолташда-шамыч дене вашлияш тыршыза. Каныш кечылаште сӱаныш, вес пайремыш каяш огеш темлалт.

Л.Камалетдинова

Опубликовать в Одноклассники

Добавить комментарий