Марий Эл правительствын резерв фондшо гыч регионын Тазалыкым аралыме министерствыжлан эше 21 млн. теҥгем ойырымо.
Тидын нерген республикым вуйлатыше Александр Евстифеев 9 апрельыште У коронавирус инфекцийым кондымым да шаркалымым шижтарыме шотышто оперативный штабын заседанийыштыже ойлен.
«Республикын правительствыже пандемий условийыште пашам ыштен кертше изи бизнес ден субъект-влакым рашемден. Ме лийме семын шекланаш кӱлмӧ мере-влак нерген ойленна, да чыла субъект, вуйлатыше да собственник, нуным шуктен, пашам ыштыме нерген ӱшандарышт. Кокымшо, мо нерген ойлынем, шкат ужыда, вирусын шарлыме показательже кугемын толеш. Сандене таче республикын правительствыже пандемий дене кучедалмашке виктаралтше бюджетым угыч ончен лекте. Регионын Минздравшылан эше 21 миллион теҥгем ойырымо. Российын Минпромторгшо дене шодым искусственно вентилироватлыше 11 у аппаратым писынрак кондымо нерген кутырен келшен кертна. Ӱшанем, нуным лишыл жапыште кондат, да неле черле-влаклан полшаш кучылташ тӱҥалыт», – палемден Марий Элым вуйлатыше.
А.Евстифеев, медицине велым чыла ыштыме гынат, республикыштына у коронавирус инфекциян икымше пациентын колымыж нергенат ушештарен.
«Родыж ден лишыл еҥже-влаклан чаманымашым каласена. Тиде неле йомдарымаш. Тӱнямбал проблеме экологий велым яндар да ужар республикышкынат толын шуо. Пеш жал, но ме мом ыштена, результатым пуышаш. Тидланак тыште погыненна», – манын А.Евстифеев.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
