Марий Турек районысо Сардаял общеобразовательный школын тунемшыже-влак кумшо чырыкым у школышто тӱҥалыт. У оралтым тений декабрьыште чоҥен шукташ палемдыме.
29 октябрьыште Марий Элым вуйлатыше Александр Евстифеев Марий Турек районышто лиймыж годым Сардаялыште тунемме верым чоҥымо шотышто паша ышталтмым терген. Подрядный организацийым вуйлатыше Руслан Муталиевын ойлымыж почеш, объект 50 процент утлалан ямде. Кызыт тушто леведышым, отделкым, оралте кӧргыштӧ инженер коммуникацийым ыштат, окнам монтироватлат да йырым-йырысе кумдыкым шотыш кондат.
Школым вуйлатыше Полина Сорокинан палдарымыж почеш, таче образовательный организацийыште 34 йоча шинчымашым пога, школ деч ончычсо группыш 19 икшыве коштеш. Нунын дене 11 туныктышо тырша, коклаштышт самырык специалист-влакат улыт. «Чыланат у школын чоҥен пытарымым изин-кугун вучат», – каласен вуйлатыше.
«Поян историян школышто чумырымо педагог-влакын коллективыштым арален кодыман. Тӱҥжӧ – образованийым пуымо паша рӱдолаште гына огыл, изи яллаштат вияҥшаш», – палемден Александр Евстифеев.
Регионым вуйлатышын мутшо почеш, тачысе кечылан Марий Турек районышто ик эн пӱсӧ йодыш – посёлкыла кокласе корным олмыктымо паша.
«Ала-кунам корнышто асфальт лийын, ынде тудо нормативлан келшен ок тол, эсогыл тыгыде кӱым ыштыме семын ончымаштат. Но тиде – районысо да регионысо кучем-влакын йодышышт. Конешне, национальный проект, республикым социальный да экономике могырым вияҥдыме дене кылдалтше программе-шамыч умбакыже илышыш шыҥдаралташ тӱҥалыт гын, корным нормо дене келшышым ыштат, верысе кундем вияҥаш тӱҥалеш», – каласен республикым вуйлатыше.
Марий Турек районышто тудо тыгак Кугу Карлыган ялыште лийын. Тушто республикын ик эн тошто тунемме вержым – К.А.Андреев лӱмеш кыдалаш общеобразовательный школым – капитально олмыктымо паша кая. Палемдыман, таче тушто 2-шо гыч 9-ше класслаште тунемше-влаклан марий йылмым да удмурт йылмылам туныктат. Икымшыжым 64 йоча тунемеш, кокымшыжым – 56. Нунын дене 17 туныктышо тырша, нунын кокла гыч визытынже «Россий Федерацийысе общий образованийын почётан пашаеҥже» лӱмым нумалыт.
Кугу Карлыган школым 1974 ийыште почмо, сандене тушто паша шуко: инженер сетьым вашталтыман, леведышым да окна-влакым уэмдыман, тошто электросетьым кораҥдыман да уым вераҥдыман, пищеблокым шотыш кондыман да кӱлешан моло сомылым шуктыман. Палемдыме марте кызытлан пелыжым ыштыме, но, чаманен каласыман, график деч ятырлан почеш кодмо. Тидын нерген Александр Евстифеевлан подрядный организацийым вуйлатыше Евгений Мосеев увертарен.
«Арня мучаш марте школым сдатлыме корно картым ыштен шуктышаш улыда. Кумшо пачаш гыч тӱҥалза», – каласен регионым вуйлатыше. Тидын деч посна тудо йырым-йырысе кумдыкым тӱзаташ тӱҥалаш кӱлеш манын палемден.
Марий Эл Республикым вуйлатышын организаций да
аналитике виктемжын уверже негызеш
Г.Кожевникова ямдылен.
