О муро, муро, поро йолташем…
Мурын вий-куатше кугу: тудо кумылым нӧлтен, шулдырым куштен кертеш але айдемым сырыктен, чонымат сусыртен сеҥа. Арам огыл калык ожнысек мурен: паша годымат, пайрем кечынат, айдемым вес тӱняш ужатыме годымат… Муро калыкын илыш корныжым, куан ден ойгыжым, чон-шижмашыжым, ончыкылык нерген шонымашыжым келгын почын ончыкта.
Йолташ-влак, мурызо-влак кокла гыч кӧм колышташ йӧратеда? Могай муро чонланда лишыл?
Вера КАМЕНЩИКОВА, Россий калык усталыкын сулло коллективше, «Мурсескем» ансамбльын хормейстерже:
– Мыланна калык фольклор лишыл. Мутлан, Марий Турек районысо «Арбор вел», Татарстан республик гыч «Элнет» фольклор ансамбль-влакын муралтымышт пеш келша. Тыгак Советский районысо Кельмаксола могыр артист-влакын гармонь сем почеш муралтен колтымыштым ончаш йӧратена.
Калыкын йӱлаже, тӱвыраже дене кылдалтше, кундемын ойыртемжым почын ончыктышо муро-влак келшат. Садлан «Мурсескем» ансамбльын репертуарыштыжат тыгай муро-влак улыт.
Теве шукерте огыл Кужэҥерыш концерт дене мийышна. Тушто рвезе-влак одо марий-влакын мурыштым муралтышт. Калык шокшын вашлийме кумылым нӧлтыш.
Ирина ЧЕПИКОВА, кидмастар (Звенигово район):
– Самырык мурызо-влакын мурымыштым куанен ончем. Нунын мурышт утларакше кызытсе саманлан келыштарыме, у семын йоҥгалтше улыт. Теве, мутлан, шукерте огыл Марий Эл радион эртарыме «Идалыкысе муро» фестивальыштыже Дмитрий Веденькинын мурыжо, сценыште шкем кучымыжо кумылым нӧлтыш.
Чоныш логалше, илыш нерген шонаш таратыше муро-влакым колышташ йӧратем, а весела шӱлышан мурсаска, мутат уке, кумылым нӧлта, иктаж сомылым куштылгын ышташ полша.
Галина ФЁДОРОВА, «Кооператор» йоча лагерьын кочмывержым вуйлатыше:
– Шочмо вер, ава нерген мурым колышташ келша. Тыгай годым ушем дене чарайолын куржталме шочмо Морко кундемышкем «миен толам», йоча пагыт гыч ушеш кодшо волгыдо шарнымаш чоным вӱчка.
Мылам Володя Матвеевын, Йорга качын мурымышт пеш келша, а Сергей Пакеевын, гармоньым шокталтен, муралтен колтымыж почеш йол шкежак тавалташ луктеш.
Пытартыш жапыште йоча, самырык-влакын сценыш лекмышт куандара. «Идалыкысе муро» фестивальыште, мутлан, Артем Ягодаров кочаж нерген мурым моткоч ӱшанлын йоҥгалтарыш.
Вероника ЯДЫКОВА, блогер:
– Мурым кызыт йӧршын гай ом колышт. Машина дене ялыш кудалме годым пелашем коклан гына чӱкта. Тунамжат руш радиом колыштына. А ондак марий мурым колышташ моткоч йӧратем ыле. Марий Эл радиошто йоҥгышо чыла гаяк мурым паленам. Кызыт могай у муро лекмымат, у мурызымат ом пале. Туге гынат йӧн лекме семын такмак-влакым колыштам, кокланже муралтемат.
А.БАЙКОВА ямдылен
Авторын фотожо
