Оршанке районысо Кугурак тукымын рӱдерже Ӱдырамашын тӱнямбал кечыж вашеш шкет илалше-шамычлан кок акцийым эртарен.
Эртыше изарнян рӱдерын «ший ийготан» волонтёржо-влак Евгения Коваленко ден Галина Мякишева Марковысо ветеран пӧртыштӧ «Моторлыкым пӧлекле» акцийым эртареныт: илалше еҥ-шамычын ӱпыштым пӱчкыныт, шинчапуныштым чиялтеныт. Чыла тидым чылт яра ыштеныт.
А кугарнян районысо Ветеран-влак советын председательже Ирина Смирнован организоватлымыж почеш Кугурак тукымын рӱдерышкыже коштшо да Марково ветеран пӧртыштӧ илыше-влак тӱшка мончаште мушкылтыныт – адакат яра. Капкылым кандарыше тиде мероприятий «Шокшым пӧлекле» акцийын кышкарыштыже эртен.
– Кок акцийжымат ий еда 8 Март вашеш эртараш тыршена. Ветеран пӧртыштӧ илыше ӱдырамаш-шамыч шкет улмыштым ынышт шиж, пайрем вашеш мотор лийыш манын шонена. Тыгай тӱткышланна нуно моткочак йывыртат, пачаш-пачаш тауштат. А тидыже эшеат шуко поро пашам ышташ кумылаҥда, – манеш Ирина Николаевна.
М.ИВАНОВА
И.Смирнован фотожо
