Марий Эл онкологийыште волонтёр толкыным негызлыше Ирина Стояновская «Ме илаш тӱҥалына!» национальный конкурсышто сеҥышыш лектын.
Тиде конкурсым Пациент-влакын тӱнямбал ушемыштын да Гематолог ден онколог-шамычын национальный обществыштын тӱҥалтышышт почеш онкологий ваштареш кучедалме пашаште надырым пыштыше да черле-влаклан полшышо врач, волонтёр, мер пашаеҥ да журналист-шамыч коклаште ончылий увертарыме.
Номинант-влаклан кодшо ий мучко йӱклымӧ. Иктешлымаш почеш эн сайлан 90 наре номинант ден элнан тӱрлӧ регионжо гыч 17 коллективым шотлымо.
Сеҥыше-шамыч коклашке Марий Эл гыч пенсионер Ирина Стояновскаят логалын. Тудым «Чемпионы во всём» номинацийыште сайлан шотлымо. Ӱдырамаш шкежат неле чер ваштареш кучедалын, сандене молыланат полшаш кумылаҥын, кызыт Республикысе онкодиспансерын иктӧр консультирований кабинетыштыже ышта.
«Ме илаш тӱҥалына!» конкурсышто Марий Элын сулло врачше Светлана Немцевамат профессионализмжылан да пациент-шамыч дене сайын пашам ыштымыжлан посна таумут дене палемдыме.
М.ИВАНОВА.
