«Кас гармонь» гран-при дене пӧртылын

8-10 сентябрьыште Киров областьысе Кстинино селаште, «Алые паруса» йоча каныме лагерьыште, эртаралтше «Вятские-Хватские» фестиваль-конкурсышто Шернур районысо тӱвыра да каныме рӱдер пеленысе «Кас гармонь» ансамбль (вуйлатышыже – Саша Иванов)  йыгыр кум иза-шольо Шабдаровмыт дене пырля гран-прим сеҥен налын.

Тиддеч посна ансамбльын участникше-влак Саша Иванов ден Алексей Горинов «солист, гармонист» номинацийыште икымше степенян лауреат лийыныт.

Фестивальыште тыгак Удмурт, Коми, Чуваш республикла, Вологда, Архангельск, Киров областьла, Луганск калык республик гыч гармонист, калык сымыктыш да усталык дене палдарыше коллектив-влак мастарлыкым ончыктеныт.

– Пошкудо кундемыш миен толаш шийвундо полышым ойырымыштлан  Шернур район администраций вуйлатыше Александр Викторович Кугергинлан, «Земледелец» ял озанлык артель вуйлатыше Светлана Сергеевна Клепиковалан, тыгак талантан эрге-влакым ончен куштымылан да чапле куштымашым шындымыжлан Татьяна Эриковна Шабдаровалан, сценыште йоҥгалтарыме марий такмакна-влакым рушлашке сайын кусарен пуымыжлан Марий Элын калык поэтше Геннадий Сабанцев-Оярлан кугу таум ойлена, – каласыш гармоньчо да мурызо Саша Иванов.

Вуйлатышын ойлымыж почеш, шернур  артист-влак мастарлыкышт дене чылам ӧрыктареныт. Жюрин еҥже-влакат шокшо кидсовыш дене пырля, кок кугуварняштым кӱшкыла нӧлталын, «Браво!» манын ончыктеныт.

– Москосо «Руш гармонь» продюсер рӱдер вуйлатыше, композитор, поэт, «Российын гармонистше-влак» телепередачым вӱдышӧ Александр Николаевич Ганичев мемнан ансамбльым январьыште Йошкар-Олаште эртаралтшаш фестивальыш ӱжӧ. Удмуртий гыч мийыше делегацият шкешт дене вес ийын кеҥежым эртаралтше фестивальыш ӱжмашым кучыктен, – палемдыш С.Иванов. – Сеҥыше-влакым уремыште саламлымышт годым мыланна, гран-прим налше-влаклан, гармонь почеш эше ик гана мурен-кушташ темлышт. Шуко шоныде, еҥ деч гармоньым налын, Шернур вел семым шокталтышым, а Никита, Илья да Алёша веселан тавалтен колтышт.

А.БАЙКОВА   

А.Ивановын фотожо