КУЛЬТУР ДА ИСКУССТВО

Шке ончен куштымо тамле да пайдале

Игече левырак лияш тӱҥалмеке, еҥ-влак садыште але пӧрт воктенысе пакчаште жапым утларак да утларак эртарат. Мландым кӱнчат, тӱрлӧ шӱкшыдым кораҥдат, ӱяҥдышым оптат… Мландым сайын ямдылен шуктымеке, пакчасаскам шындат.

Йолташ-влак, пакча пашам йӧратеда але тыланда чылажымат кевытыште налаш келша? Сад-пакчаштыда мом ӱденда але шынденда?

 Вячеслав Созонов, Марий Элын калык артистше, Э.Сапаев лӱмеш опер да балет академический театрын артистше (баритон):

– Сад-пакчам ача-авамын шочмо сурт пеленже, Советский районысо Кукмарийыште,  кучена. Ме еш дене чеснокым чот йӧратена, садлан тудым шукак шындаш тыршена. Тений тудлан эшеат кугурак кумдыкым ойыренна. Чеснокым кажне кечын шӱр дене кочкына. Тыгак эше сельдерейым, укропым, петрушкым, салатым шындыме. Ужар йӧршудат тазалыклан пеш пайдале.

Лишыл кечылаште пареҥгым шындаш кайышаш улына.

Сергей СВЕЧНИКОВ, марий шымлызе, историй шанче кандидат:

Сад-пакчаште мландым кӱнчаш, вӱдым шаваш, шӱкым кӱраш да саскам погаш эреак полшем. А пакчаштына пареҥгым, шоганым, кешырым, киярым, помидорым, ковыштам да молымат куштена. Шке ончен куштымо кеч-могай пакчасаска тамле веле огыл, эше пайдале.

Ирина Юшкина, самырык мурызо:

– Ынде шым ий Козьмодемьянск олаште илем, туге гынат шочмо ялышкем ача-авам деке миен толашак тыршем. Туштак – сад-пакчана. Тушто ме пареҥгым, кешырым, ушменым, ковыштам, киярым, помидорым да эше мӧрым куштена.

Садыштына олма, грушо, сливе, эҥыж кушкыт, ий еда саскашт дене куандарат.

Пакчаште иквереш погынен, тӱрлӧ нерген мутланен,  пашам ышташ пеш келша. Тыгай годым жапшат писын эрта.

А.БАЙКОВА

 

Опубликовать в Одноклассники

Добавить комментарий