«СУРТ-ПЕЧЕ» ГАЗЕТЫН ШУШАШ НОМЕРЫШТЫЖЕ ЛУДАШ ТЕМЛНА
Шонымым весемдыше илыш сӱрет
Шкешотан айдеме…
Нимом шылтыде ойлаш гын, начальницем моткоч шкешотан айдеме. Тудым умылен шукташ лийдымыжак пелен улшо ты айдемым йӧршын вес семын аклаш тарватыш манаш мо ли?
Тыглай ончалмаште – пеҥгыдын йодын моштышо да икмыняр ошкыллан ончылгоч шонен пыштыше шонымашан вуйлатыше. Нигунам ок шыргыжал, вучыдымын лийын кайыше, кумылым волтышо кеч-могай ситуаций лиймекат эре шкенжым куча, шагал кутыра. Икманаш, утеш ок мутлане, лач паша дене кылдалтше икмыняр ойкылдышым гына пелешта. Койдарыме, мыскарам ыштыме нимогай «эрыкан» шомак мутпогыштыжо ок вашлиялт. Шкеж деч ӱлнырак шогышо пашаеҥже-влак деке поро кумылым ончыктымо койышыжат иканат шижалтын огыл.
Тиде айдемым рашемден иктешлыме ончылмут… тевыс тыгай лекте. А теве ик илыш сӱрет тудым вес могырын ончалын аклаш тарватыш. Шоналташ да илышым вес семын ончалаш таратыше ты шучко пашажат шӱлыкан, йӱран эртыше кечылаште веле лие.
Лавыран да ночко игечын тыгаяк кумылан пашаш кудалаш остановкыш лӱҥгыштам. Изиш ончылнырак корно воктене автомашина чарнен шогале да, утым шекланыде, тушеч ала-мом мландыш шо-олт гына луктын кудалтышт. Мемнан олаште водительын веле огыл, пассажирыштынат эртен кудалше авто окна гыч шӱкшакым чӱчкыдын луктын кудалтымыштлан, тыгай йырнык койыш дене орланымыштлан ынде шукынжо изиш тунем шуынна гынат, садак чонлан эре йыгыжгын чучеш. Тыге шонен ошкылмо татыште машина газым кыш-ш-ш луктын колтыш да писын кудале.
Корнышто кийылтше лавыран целофан вӱдылка деке лишемым. Ночко корнышто йӱр деч пушеҥге пелен пызнен шылаш тӧчышӧ француз бульдог урлык изи гына пинеге лопка зонт йымач койылалте. Шӱлык да умылыдымаш дене темше кугу лӱдшӧ шинчаж дене кызыт гына кудал кайыше автомашина велкыла тунар лӱдшын онча. Чаманыде йӱршӧ йӱштӧ шыже йӱр тудым икмыняр минутышто вошт нӧртенат шуктыш. Лавыраҥше пинеге тидым шотыш налде, ӧрт лекшаш гай жалын нюслен шинча.
– Утыш лекше докан, – шоналтышым да воктечше эртенат ошкылынам ыле, но ала-можо чарен шогалтыш да мӧҥгеш пӧртылыктыш. Ала… «ой, Юмыжат, вет илышыште тыге лийшаш огыл» манын шоналтышым да шинча ончылнемак кызыт гына лийше кочо шижмаш мыйым вес семын ышташ таратыш? Чонемлан тына-ар йӧсӧ лийын колтыш. Кушеч чыла чонан деке шотлан толдымо тыгай чаманыдымаш? Кузе тыге вийдыме падыраш ик татыште утыш лекте? Тудат чонан огыл мо?
Чонем ыш чыте, пинегым ночко асфальт гыч нӧлталын, куртко йымак чыкалтышым. Суапле пашам ыштымемлан куанен, «шочмо организацийын» чапше лӱмеш пашам ышташ ошкыл колтышым. А изи пинеге ала кылмымыж, ала лӱдмыж дене тына-ар чытыра, шӱмжӧ тыге-е кӱлтка, лектын возеш шонет…
«Луктын кудалтыме вӱдылкам», кабинетышке пурымеке, принтерлык кагаз деч кодшо коробкаш пыштышым да жаплан ӱстел йымак шӱкал шындышым. Тек шинчалта манын шоналтышым. Мӱндыр огыл, кечывал жапыште мӧҥгӧ мартеат намиен коден шуктен кертам. Мӧҥгыштем тугакшат дворян урлык гыч кок «кудалтыме» пий ласка илышым илат, ынде эше кумшо.
Р.ЧЕПАКОВА ямдылен
Фотом интернет гыч налме
