Тунемшын сеҥымашыже – эн кугу сеҥымаш
Россий ФСБ-н академийжын общеобразовательный организацийлаште тунемше-влаклан обществознаний предмет дене эртарыме регион-влак кокласе кӱкшытан олимпиадыштыже Марий Элын Бауман лицейже гыч Анна Бусыгина сеҥыше радамыш лектын. Тудым 27 июньышто Марий Элыште Россий ФСБ-н виктемжын историй-демонстраций залыштыже торжественно саламленыт (снимкыште).
Тушто ӱдыр пелен ешыже, республикын образований да науко министрже Лариса Ревуцкая, Бауман лицейын директоржо Григорий Пейсахович лийыныт.
– Тунемшынан I степенян дипломым сеҥен налмыжлан мотокочак куаненам! Тыгай ӱдырым ончен куштымыштлан ача ден авалан тау! – каласен Григорий Пейсахович.
Лариса Анатольевна тыге палемден:
– Мыланна кажне йочан сеҥымашыже – кугу событий. Тыгай кӱкшытыштӧ сеҥымаш Марий Эллан моткочак кӱлешан.
Олимпиаде нерген Анна интернетыште интеллектуал конкурсым кычалмыж годым пален налын, сандене сеҥымаш нерген ончылгоч шоненат огыл.
– Мылам журналистике, социологий, текст-шамыч дене паша утларак келша. Тиде олимпиадылан мылам политологий дене гына огыл, тыгак историй дене шинчымаш кӱлын. Лу заданийым ышташ ныл шагат пуалтын, – каласен ӱдыр.
Россий ФСБ-н академийжын обществознаний дене эртарыме олимпиадыштыже сеҥымаш ведомствын вузлашкыже тунемаш пураш йӧным ышта. Но тушко утларакшым эрге-влакым налаш тыршат, а ӱдыр-шамычым йот йылме факультетыште вучат.
Ушештарена, ӱмаште тыгаяк олимпиадыште мемнан республик гыч Т.И.Александрова лӱмеш 11-ше №-ан лицейыште тунемше Валентина Стрельникова сеҥышыш лектын.
Г.Кожевникова
Фотом интернет гыч налме
