19 августышто Шернурышто Физкультурник-влакын кечышт лӱмеш спорт мероприятий лийын. Тудо «Тазалык верч – парклашке, спорт площадкылашке!» ӱжмаш дене эртен.
Тиде кечын тыгак ГТО нормативым шуктымо шотышто тестым эрташ йӧн пуалтын. Эн тӱҥжылан адакат калыкын йӧратыме футбол шотлалтын. Тудын деч посна нигузе. Тиде вид дене районын чемпионатше лийын. Тушто «Поколение» ден «Семол» модыныт. «Поколение» 4:2 счёт дене сеҥен.
20 августышто Советский посёлкышто футбол дене Марий Элын кӱшыл лигыштыже модшо «Звезда» ден «Сокол» команде-влак таҥасеныт. Матч 0:2 счёт дене мучашлалтын. Соперникын капкашкыже мечым «Соколын» футболистше-шамыч Борис Щеглов ден Денис Емельянов пуртеныт.
– Кызыт футбол дене районын да республикын чемпионатше умбакыже шуйна. Кӱшыл лигыште модшо команде-влак коклаште «Сокол» визымше верыште, – палемдыш Шернур районышто спорт ден физкультурлан вуйын шогышо А.Иванов.
Е.Эшкинина.
