Марий Элым вуйлатышын пашажым жаплан шуктышо Юрий Зайцев Волжскышто 2-шо №-ан оласе поликлиникыште олмыктымо пашам писемдаш каласен.
Волжскышко миен коштмыж годым Ю.Зайцев 2-шо №-ан поликлиникым олмыктымо паша дене кылдалтше ситуацийым шымлен. Кызыт объект 50 процентлан ямде, но паша почеш кодын шукталтеш.
Поликлинике – кӱлешан социальный объект, калык тудым олмыктен пытарымым вуча, сандене эскерыше орган-влаклан чылажымат жапыштыже шуктымым тергенак шогаш кӱлеш, манын Ю.Зайцев да ситыдымашын амалжым рашемдаш йодын.
Подрядчикын мутшо почеш, вараш кодмо амал проект документацийыш пуртыде кодымо ешартыш пашам шуктымо дене кылдалтын, поликлиникым ик тылзе гыч олмыктен пытарат.
«12 августышто мыланем объектым сдатлыме нерген каласыза. Тылеч посна пашан кузе шукталтмыжым оперативный режимыште эскераш тӱҥалына», – манын республикым вуйлатышын пашажым жаплан шуктышо.
Тымарте зданийын икымше пачашыжым олмыктен пытарыме: шокшо ден йӱштӧ вӱдым налме пучым, олтымо системым вашталтыме, у сантехникым шындыме. Кӧргым тӱрыснек олмыктымо: пырдыжым чиялтыме, туврашым шупшмо, линолеумым вашталтыме, режимный кабинетлаште пырдыжым плитке дене ковыжымо. 1,7 миллион теҥгеаш медицине оборудований ден мебельым налме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
