Кучемыште

Каныме жап пайдалын эртышаш

Марий Элым вуйлатыше Александр Евстифеев экспресс-тестым налаш да Вакцинаций рӱдерын пашажым умбакыже шуяш 17 млн. теҥгем ойырен.

28 октябрьыште регионым вуйлатыше А.Евстифеевын кӱштымыж почеш, 4 млн. теҥгем Йошкар-Оласе Сеҥымашын ХХХ идалыкше лӱмеш тӱвыра полатыште верланыше Вакцинаций рӱдерын пашажым умбакыже шуяш, 8 млн. теҥгем СПИД-рӱдерлан пробовыделенийын автоматический станцийжым налаш да тудын полшымыж дене у коронавирус инфекций дене черланен кертше утларак еҥым тергаш, 5 млн. теҥгем COVID-19 инфекцийым диагностироватлыме экспресс-тестым налаш ойырымо.   

«Совещанийын тачысе темыже у коронавирус инфекций дене кылдалтше нелылыкым сеҥыме пашам вияҥдыме дене кылдалтын. Российын президентше ты йодыш шотышто наступательный форматыш куснаш пунчалын. Тидланже элыштына пашам ыштыдыме кече-влакым увертарыме. Ме ешартыш каныш кече-шамычым огына увертаре, но бизнес ден озанлыкым кучышо субъект-влакын еҥышт дене пашам ыштыме тугай принципым чоҥена, кудыжо у коронавирус инфекцийлан умбакыже шарлаш чаракым ышта. Вакцинацийым ончыкыжат эртарыме, ПЦР-тестированийым икмыняр пачаш кугемдыме, экспресс-тестированийым ыштыме да Сеҥымашын ХХХ идалыкше лӱмеш тӱвыра полатыште Вакцинаций рӱдерын пашажым умбакыже шуйымо пашам эшеат саемдаш кӱлеш. Тидланже организационный да кадр пунчал-влакым ыштыман, молан манаш гын медицине персоналын чотшым кугемдыме шотышто ешартыш единице-шамыч кӱлыт. Да, президентын кӱштымашыж ден ковид дене кучедалме йодмашым шукташ манын, нине пашалан финансым ойырымо йодыш уло», – манын А.Евстифеев Республикыштына у коронавирус инфекцийым кондымым да шаркалымым шижтарыме шотышто оперативный штабын черетан заседанийыштыже.

Республикын тазалыкым аралыме министрже Марина Панькован палемдымыж почеш, регионыштына у коронавирус инфекцийын шарлымыж дене кылдалтше сӱрет чумыр Российысе семынак моткоч начар, тидыже вакцинацийым эртарыме пашам эшеат вияҥдаш да писемдаш йодеш.  

Совещанийыште Вакцинаций рӱдерын пашажым эше кок тылзылан шуяш кутырен келшеныт.

«Ойырымо средствыда ден пуртымо мерыда-влак мыланна инфекцийым жапыштыже рашемдаш, пациент-влакым таза еҥ-шамыч деч посна ойыраш, эмлаш тӱҥалаш, вакцинацийым палынак писын эртараш йӧным ыштат. Чыла тиде элым да Россий Федераций правительствым вуйлатышын кӱштымашыжым шукташ кӱлшӧ показательлашке шуаш полша», – регионым вуйлатышылан манын М.Панькова.

Чараклыме мере ден QR-код-влакым пуртымо деч вара республикыштына у коронавирус инфекций деч прививкым ыштыктыше-влакын чотышт палынак кугемын, рашемден Марий Эл правительстве председательын алмаштышыже Ольга Фёдорова. Мутшо почеш, 26 октябрьыште гына 6 тӱжем еҥ вакцинироватлалтын. А кече еда кокла шот дене 5-5,5 тӱжем еҥ прививкым ыштыкта.

«Тиде сай тат, тудо республикыште илыше калыкын прививкын кӱлешлыкше ден чынлыкшым умылымыжым ончыкта, но ме умылышаш улына – увертарыме каныш кечылаште вакцинироватлалтше-шамычын чотышт иземшаш огыл. Тиде паша тыгакак шукталтшаш. Бизнесын клиентше-влак ончыкыжымат лийышт манын, вакцинаций кызытсе семынак да тылечат виян эртышаш», – каласен регионым вуйлатыше.

Совещаний мучаште А.Евстифеев шуктымо пашан иктешлымашыж ден калыкын вакцинироватлалтмыж шотышто мониторингым каныме жап деч вара вигак ышташ кӱлмым палемден.

1-7 ноябрьыште республикысе чыла медицине организаций ден вакцинаций рӱдер пашам ышта.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

 

Опубликовать в Одноклассники

Добавить комментарий