Марий Эл Республикын Ялозанлык да продовольствий министерствыштыже ты паша дене кылдалтше предприятий ден организаций-влакын еҥышт дене «Марий продукт» лўман единый брендым ямдылыме йодышым каҥашыме. Совещанийыште республикыште ыштен лукмо продукцийын чапшым Марий Элыште да тудын деч ӧрдыжтӧ умбакыже нӧлтымӧ, сатум фирменный кевытла гоч утларак ужалаш, выставке ден ярмиҥгалаште кумданрак участвоватлаш кўлмӧ нерген мутым тарватыме.
Министр Ю.Сидыганов палдемден: республикыште сатум ыштыше-влакын продукцийыштым шуко моло вере кумдан палышт манын, нунылан ойыртемалтше тамгам (знакым) ямдылаш кўлеш. Ты тамгаже почеш элыште мемнан сатунам налше чыла еҥ кундемыштына экологически яндар продукцийым гына ямдылыме нерген пален шогыжо да тудым веле налаш тыршыже. «Марий продукт» знакын проектшым ямдылаш дизайн пашам шуктышо специалист-влаклан темлыме. Ямде лиймеке, тудым чапле продукцийым лукшо эн сай предприятий-влакын сатушкышт шындылаш тўҥалыт.
А.АНДРЕЕВ.
