У Торъял районысо Тошто Торъял селаште шочшо поэт, писатель, журналист Геннадий Пироговлан, ила гын, 4 июльышто 81 ий темеш ыле.
Калык чонышто Геннадий Михайлович нерген шарнымаш эше кужу жап илаш тӱҥалеш, очыни – шочмыжлан 80 ий теммым палемдыме годым ӱмаште тудлан Шарнымаш оҥам почаш ойым пидыныт да тидым илышыш пуртеныт — илыме пӧрт пырдыжышкыже пижыктыме Шарнымаш оҥам 6 июльышто почыч да тидын лӱмеш митингым эртарышт.
Оҥа ӱмбач куэмым Геннадий Пироговын Валерий эргыж ден Эльвира ӱдыржӧ кораҥдышт. Кызыт Тамбовышто илыше, ты кече вашеш лӱмынак ачажын шочмо ялшыкыже толшо тиде ӱдыржӧ тудым пагалымылан тауштыш, ачаж дене моткочак кугешнымыж нерген нелынрак гынат, садак марла лудо-ойлыш.
Лӱмлӧ да пагалыме еҥын могай айдеме лиймыж нерген шарналтен, поро мутым Марий Элын тӱвыра, печать да калык-влакын пашашт шотышто министерствын пашаеҥже Игорь Садовин, Тошто Торъял ял шотан илем администраций вуйлатыше Николай Широбоков, верысе школ директор Иван Ельмекеев, писатель Мария Илибаева, поэтессе Зоя Висвис, икмыняр моло ойлышт.
Пелашыже, Римма Ивановна, марийже нерген поснак чонеш логалшын шарналтыш:
— Тудо моткочак поро, шӱшпык муро гай весела кумылан айдеме лийын. Уна-шамычым вашлияш моткоч йӧратен. Тыгай годым, гармоньжым налын, Торъял вел мурыжым йоҥгалтара ыле. Шочмо кундемжым чот йӧратен да тудын дене кугешнен. Санденак тышке чӱчкыдын толаш тыршен. Юмо мыланна мыняр пӱрен, тунар жап Геннадий Михайловичым шарнен илаш тӱҥалына.
Тошто Торъял тӱвыра пӧрт пеленсе «Ший оҥгыр» ансамбльын участникше-влак гын М.Леухина ден В.Яндыганов (семжым тудо келыштарен) Геннадий Пироговын почеламутшылан возымо мурым йоҥгалтарышт.
Тоштыеҥ-влак мыланна лыве лийын кончаш йӧратат, маныт. Очыни, тиде тыгак. Изарнян игече йӱран да юалге ыле гынат, еҥ-влакын Геннадий Михайлович Пирогов нерген ойлымышт годым кенета ала-кушеч изи лыве толын лекте да мемнан коклаште чоҥештылын, тудак койдымын ала-кушко каен йомо. Очыни, тиде, Геннадий Михайлович тудлан пӧлеклалтше митинг-пайремышкыже толын кайыш…
Любовь Камалетдинова.
Авторын фотожо.
