Шорык
Але марте могай сомылым варалан коденда улмаш, кызыт тудын деке пӧртылаш темлалтеш, уке гын пашаште вуйлатыше але ешыште лишыл еҥ-шамыч дене умылыдымаш лектын кертеш. Тиде арнян оксам кӱсын пуыман огыл.
Презе
Тендам тыглай арня вуча. Тора родо але ондакысе йолташ деч уверым налыда, но тудо утыжым ӧрыктарыше але куандарыше огеш лий. Шӱмбелда ала-мо шотышто кычалтылаш тӱҥалеш, туге гынат тудлан ида сыре. Корныш тарванаш келшыше жап огыл.
Йыгыр
Тыланда тиде арнян тӱрлӧ шотышто тургыжланаш шагал огыл логалеш. Тыгодым чылажат еш дене кылдалтше лиеш. Пашаштат ыштышаш ятыр погына. Чытышым ончыктеда гын, кеч-момат куштылгын сеҥеда, сандене азапланымыдам чарныза.
Рак
Илышышкыда вашталтышым пурташ шукертсек шоненда гын, кызыт тидлан жап толын шуын. Пашаште оксам ешараш, вес должностьыш кусараш лӱдде йодын, у шонымашым шыҥдараш темлен кертыда. Тӱжвал сындамат вашталтеда гын, сайрак лиеш.
Лев
Тиде арнян могай кугу пашам ышташ палемденда улмаш, чыла тидым шӱдыр-влак кызыт огыл, а варарак илышыш пурташ темлат. Молан манаш гын ты пагыт тыгайлан келшыше огыл. А теве йӧратыме еҥ але еш дене пырля каналташ эн сай жап.
Ӱдыр
Ты арнян тендан деке икте почеш вес торжа еҥ-шамыч пуйто лӱмын гаяк чӱчкыдын лишемаш тӱҥалыт. Нуно пашаштат, транспортыштат, кевытыштат, моло вереат вашлиялтыт. Туге гынат шкендам ласкан кучыза. Пиалеш, ешыште чылажат куандарыше лиеш.
Виса
Арням чолган тӱҥалыда. Икымше кечылаштак пашаштат, мӧҥгыштат ятыр сомылым ыштен шуктеда. Тидлан куанышаш веле ыле, но ондакысе йолташда толын лектеш да тендам тунамсе жапыш пӧртылаш, йокрокланаш тарата. Арака дене кылым кучыман огыл.
Скорпион
Тиде арнян кӧргыштыда погынышо моткоч кугу вий-куатым шижыда, но тыланда утыждене чот кыртмен пашам ышташ огеш темлалт. Молан манаш гын, писын нойымылан кӧра депрессий авалтен кертеш. Шерге сатум кызыт налаш огеш темлалт.
Пикшызе
Тыланда пашам пырля ыштыше-шамыч коклаште тендан семын шонышым кызыт кычалман огыл. Нуно чыланат ваштарешда улыт манаш огеш лий, туге гынат лучо тидым варараклан кодыза. А моло шотышто арняда сайын эрта.
Ирказа
Пашаштат, мӧҥгыштат лидер улмыдам ончыктеда. Тендан вуйлатыме кеч-могай сомыл ворана. Но лишыл еҥда-шамычым утыждене «темдаш» ида тырше, уке гын ваштарешда лийын кертыт. Шкет улыда гынат, кызытеш у шӱмбел «каватӱрыштӧ» огеш кой.
Вӱд йоктарыше
Тиде арнян нигӧн полышыжланат ида ӱшане. Лишыл еҥда, йолташда, коллегыда-шамыч чыланат шке илышышт дене илаш тӱҥалыт да полшаш ала огыт ярсе, ала тидлан кумылышт огеш лий. Ешартыш оксам ыштен налаш шонен, ондалалтме деч шекланыза.
Кол
Тиде арнян илышым сай велыш вашталташ йӧн лиеш. Ешан-шамычын икте-весе кокласе вашкылышт эшеат пеҥгыдемеш. Шкет улыда гын, йӧратыме еҥым вашлийын кертыда. Пашаште тыланда чаракым ышташ, лӱмнердам волташ тӧчышӧ-влак деч шекланыза.