23 мартыште Марий Элым вуйлатыше Александр Евстифеев Россий Федерацийыш у коронавирус инфекцийым кондымым да шаркалымым шижтарыме шотышто оперативный штабын заседанийыштыже участвоватлен. Тудым Россий правительстве председательын алмаштышыже Татьяна Голикова видеоконференцкыл йӧн дене вӱден.
Заседанийыште у коронавирус инфекцийын Российыште шарлыме ситуацийже да тазалыкым аралыме системыште кызытсе сӱрет нерген мутланеныт. Тылеч посна йот элла дене авиасообщений-влакым угыч ыштыме да йот граждан-шамычым пуртымо механизмым простаҥдыме йодышлам лончыленыт.
Январь тӱҥалтыш гыч 23 март йотке Марий Элыште у коронавирус инфекций дене черланыме показатель кокла шот дене 2,1 пачаш иземын.
Пытартыш кок арняште республикыштына COVID-19 дене суткаште 23-26 еҥ черланен, тылеч кок арня ончыч 24-37 граждан инфицироватлалтын, а январьыште 45 гыч 51 случай марте регистрироватлыме.
Пандемий пагытыште эн шуко еҥ Йошкар-Олаште (50,2%), Медведево районышто (9,8%) да Волжскышто (8,8%) черланен. Инфицироватлалтше-шамыч коклаште утларакше пенсионер (38,9%), пашазе (25,3%), медик (9%) да служащий-влак (7,9%) улыт.
Пытартыш арняште 100 тӱжем еҥлан шотлымаште сутка еда кокла шот дене 200,17 тестированийым ыштыме, кеч Роспотребнадзорын регламентше почеш 200 шымлымашат сита.
Стационарлашке пыштыме пациент-влакынат чотышт иземын: 15 январьыште 949 черлылан медицине полыш кӱлын гын, 23 мартыште 376 еҥ гына эмлалтын.
Таче у коронавирус инфекций дене черланыше-влаклан шым медицине организацийын 505 койкыштыжо медицине полышым пуат. Койко фондын 74 процент ужашыштыже пациент-влак эмлалтыт.
23 март йотке республикышкына Гам-КОВИД-Вак вакцинын 21792 дозыжым кондымо. У коронавирус инфекций деч прививкым 19 медицине организацийын 110 пунктыштыжо ыштат, тылеч посна куснылшо 50 пунктым почмо, куснылшо 52 бригадым чумырымо. Кӱлеш лиеш гын, вакцинацийым эртарыме пунк-влакым ешараш йӧн уло. Прививкым ыштыше бригаде-влаклан медикаментым, пайдаланыме материалым да медицине торым погымо йоҥгытым ситарыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
