Шорык
Але марте могай йодыш-влак тургыжландареныт, нуным тиде арнян куштылгын рашемдеда. Пашаште вуйлатышыда тендам ончычсо деч кӱкшынрак аклаш тӱҥалеш. Икманаш, тиде пагыт чыла шотыштат сай, лектышан да куандарыше лиеш.
Презе
Умылыдымаш лекме годым мутланен моштымыда полша. Кугу погым налын кертыда. Амалкалче улыда гын, тиде арнян шийвундым икмыняр пачаш ешараш йӧн лектеш. Эн кугу шонымашдам кызыт илышыш пуртыза, уке гын тудо шукталтдеак кодеш.
Йыгыр
Пашаште ала-могай мастарлыкда почылтеш. Тидлан кӧра окса ешаралт кертеш. Тыгак ондакысе кылым уэмдаш темлалтеш. Тудат ончыкыжым пайдале лиеш. Родо-тукымда ден лишыл еҥда-влакат нине кечылаште тыланда полыш кидым шуялташ кумылым ончыктат.
Рак
Тиде арнян вий-куатда кугу лиеш. Окса дене кылдалтше неле йодышым рашемдаш йӧн лектеш. Пашаштыда премийым пуат докан. Ала-кӧ тыланда моткочак пайдале темлымашым ыштен кертеш. Тудын дене пайдаланыде ида код.
Лев
Шӱдыр-влак тиде арнян утларак жапым еҥ-влак коклаште эртараш темлат. Паша дене кылдалтше але тыглай вашлиймаш-влак лийыт – тунар тӱҥ огыл, кунар чыладамат ала-могай ик шонымаш, сомыл ушышаш. Тазалыкым пеҥгыдемдыман.
Ӱдыр
Нине кечылаште тыланда ик эн чот йӧратымаш ден пиал кӱлеш лийыт. Шӱмбелда дене вашкыл эшеат пеҥгыдемеш. Личный илышыште кугу вашталтыш вуча. Икшыве-влаклан шукырак жапым да кугурак тӱткышым ойырыман. Оксам арам кучылташ ида тырше.
Виса
Улшо неле йодыш-влакым рашемдаш у йӧн-влакым кучылтман, уке гын ондакысе огеш полшо. Ешан-шамычлан каныш кечылам лишыл еҥ-влак дене пырля эртараш темлалтеш. Тыге вий-куатда ешаралтеш. Шкет улыда гын, шӱмбелым вашлийын кертыда.
Скорпион
Кызыт воктеныда чыла шотыштат полшаш ямде еҥ-влак лийыт. Тыланда келшыше темлымаш-влакым ыштат гын, ида торешлане, вет нуно ончыкыжым карьер тошкалтыш дене кӱзаш йӧным ыштен кертыт. Шкет улыда гын, теат шӱмбелдам вашлийыда, очыни.
Пикшызе
Могай шонымашда-влак улыт, нуным тиде арнян илышыш пурташ тыршыза. Паша дене веле огыл, личный илыш дене кылдалтше неле йодыш-влакымат кызыт куштылгын сеҥеда. Оксада ешаралтеш. Йӧратымаш шижмаш авалтен кертеш.
Ирказа
Тиде арнян вий-куатда кугу, тазалыкда пеҥгыде лиеш, чыла пашадат ушнен толеш. У еҥ-влак дене палыме лийыда гын, ончыкыжым илышыштыда нуно чот кӱлешаныш савырнат. Ӱдырамаш-влаклан вучыдымо пӧлекым ыштен кертыт.
Вӱд йоктарыше
Нине кечылаште шканда оксам аныклыман огыл. Мом шукертсек налаш шоненда, тудын дене чондам куандарыза. Еҥ-влак коклаште чапда кушкеш. Науко да тӱвыра дене кылдалтше пашам шуктышо-влаклан арня поснак лектышан лиеш.
Кол
Шӱдыр-влак палдарат: тиде арнян те у еҥ дене палыме лийыда. Ончыкыжым тудо уло илышдам эшеат сай велыш вашталта. Тыге личный илышда дене кылдалтше чыла нелылыкда шеҥгелан кодеш. Коллегыда-влак дене кылда пеҥгыдемеш.
Ӱпым пӱчкаш тарваненда гын
26 август. Тиде кечын ӱпым пӱчкашат, чиялташат огеш темлалт.
27 август. Ӱпым пӱчмылан кӧра тазалык тургыжландараш тӱҥал кертеш. Ӱпым шемалге тӱсыш чиялтеда гын, пашаште кугу кӱкшытыш шуыда.
28 август. Тачат ӱпым пӱчман огыл, уке гын тазалыкда лунчырген кертеш. Ӱпым чиялтеда гын, еҥ-влак дене чӱчкыдын вурседылаш тӱҥалыда.
29 август. Ӱпым пӱчмӧ илышыштыда сай велышкат, удашкат вашталтышым ыштен кертеш. Ӱпым чиялтыме деч вара чӱчкыдынак ӱчашаш логалеш.
30 август. Ӱпым пӱчмылан кӧра депрессий авалтыме лӱдыкшӧ уло. Чоныштыда ласкалык лийже манын, ӱпым натуральный гай койшо тӱсыш гына чиялтыман.
31 август. Таче ӱпым пӱчмӧ деч вара кумылда нӧлталтше лиеш. Ӱпым молгунамсе деч ойыртемалтше тӱсыш чиялтеда гын, тазалыкда пеҥгыдемеш, оксада ешаралтеш.
1 сентябрь. Ӱпым пӱчкыда гын, еҥ-влаклан утларак келшаш тӱҥалыда. Ӱпым чиялташ огеш темлалт.
Л.Камалетдинова
