30 июль гыч 4 август марте Йошкар-Олаште «Дружба» стадионышто пожарно-утарыше спорт дене Россий МЧС-ын чемпионатше да первенствыже эрта.
Спортын ты видше дене эн тале спортсмен-влак 25 регион гыч толыныт, нунын коклаште тиде тӱнямбалын чемпионжо, спорт мастер-влак да молат улыт. Мероприятийым торжественно почмашке участник-влакым саламлаш Марий Эл Правительстве председательын икымше алмаштышыже Евгений Кузьмин миен. Тушто тӱрлӧ тематический площадке пашам ыштен. Пожарный паша дене кылдалтше техникым ончыктымо ончерат лийын. Эн ӧрыктарышыже вӱд печке лийын. Шке жапыштыже ты службо вӱдым печке денат шупшыктен. Республикысе пожарный службылан ты кечын у технике деч сравочымат кучыктеныт.
А таҥасымашыже икмыняр вид дене эртен: «штурмовой тошкалтыш дене кӱзымаш», «тӧрсыран полоса», «пожарный эстафете», «боевой развёртываний». Кугурак ийготан спорстмен-влак деч изирак-шамычат вараш кодын огытыл. Поснак ӱдыр-влак келшышт. Нунат штурмовой тошкалтыш дене пеш чулымын кӱзеныт. А рвезе-влакым гын ойлыманат огыл, тӧрсырым урла тӧрштен вонченыт. Чыным каласаш гын, пожарный спорт чулымлыкым, физически ямдылалтмашым гына огыл йодеш, эше пеш писын решенийым приниматлен мошташ кӱлеш. Тидым спортсмен-влак шкештат палемдат.
Таҥасымашым почмо деч ончыч Калык-влакын келшымаш пӧртыштышт Россий МЧС системыште пожарно-утарыше да йоча тыгаяк спортым вияҥден, саемден толмо шотышто кугу совещаний эртен. Тушто таҥасымашке толшо регион-влакын территориальный органыштым вуйлатыше-влак лийыныт. Погынышо-влак палемденыт: Марий Элыште спортын ты видше сайын вияҥеш. Каласен кодыман, ты таҥасымаште ойыртемалтше спортсмен да команде-влак шыжым Китайыште эртышашлык чемпионатыш каят.
С.Носова
Снимкыште: таҥасымаш годым.
Авторын фотожо.
