20-22 сентябрьыште «Шап» каныме базыште школ лесничестве-влакын слётышт эртен.
Тений тудо 55-ше гана лийын. Тушко Марий Элысе 17 муниципал образований, тыгак Татарстан республике, Киров ден Нижегородский олбластьла гыч 30 команде ушнен. Слётым торжественно почмаште республикын пӱртӱс поянлык, экологий да йырым-йырысе средам аралыме шотышто министрын алмаштышыже Константин Наговицын, Образований да науко министерствын управленийжын вуйлатышыже Елена Филиппова, Юл кундем кугыжаныш технологий университетын Чодыра да пӱртӱс дене пайдаланымаш институтын директоржо Максим Волдаев да молат лийыныт.
Кум кече жапыште чодыра дене кылым кучышо, школышто тунемше ӱдыр- рвезе-влак ты отрасльысе тӱрлӧ направлений дене («Чодырам уэмдымаш», «Чодыра таксаций», «Чодырам аралымаш», «Чодыра орол», «Чодыра науко») шке шинчымашыштым терген таҥасеныт, икмыняр мастер-классышке, модышышко, викторинышке ушненыт. Янлык тӱня департаментын, «Авиалесоохранын» пашаеҥже-влакат нунылан шинчымашым ешареныт. Команде-влаклан усталык номерымат ончыкташышт логалын. Пытартыш кечын слётым торжественно петырыме годым ойыртемалтше-влакым палемденыт.
Светлана Носова
Снимкыште: слёт почылтмо годым.
Фотом республикысе эколого-биологический рӱдерын соцлаштыкше гыч налме.
