Юл вес велысе марий олаште — Козьмодемьянскыште — «Бендериаде» койдарчык да мыскара фестивальым 25-ше гана эртараш ямдылалтыт. Тений тудо 27 июльышто лиеш.
Юбилейный пайремым кумдан палемдынешт. Козьмодемьянск И.Ильф ден Е.Петровын «Двеннадцать стульев» книгаштышт ушештаралтше Васюки олаш савырнышаш. Эшежым пайрем годым латкок пӱкен гыч иктышкыже шылтыме бриллиантын озаже лияш манын, аукционышто участвоватлаш шонышо-влаклан ончылгоч шижтарат: пайремыш толмо деч ончыч романым лудын лекташ кӱлешак. Молан манаш гын аукционым эртарыше-влак книга дене кылдалтше герой да событий-влак нерген ятыр йодышым пуэдаш тӱҥалыт. Тудым ныл шагат кастене эртарат.
Пайрем тӱрлӧ сынан лиеш. Тудо изарнянак Я.Эшпай лумеш тӱвыра полатыше «Шикарная свадьба» спектакль дене тӱҥалын. Кугарнян туштак Моско модельерын романын геройжо-влак дене палдарыше дефилеже эртралтеш. А шуматкечын чылан пристаньыште Остап Бендерым вашлийыт да тудын дене ик кечым веселан эртарат, тӱрлӧ семын кумылыштым нӧлташ тӱҥалыт.
Кече мучко чыла тоштер, шуко концерт, модыш, конкурс площадке пашам ышташ, сатум, кочкышым ужалаш тӱҥалыт. Колызо-влак гын кечывал деч ончыч таҥасымашкат ушнен кертыт. Кажныжлан посна ойырымо кумдыкышто тудым кучаш вер да жап ойыралтеш. А сеҥышыжым икмыняр номинацийыште палемдат. Сандене тушко ушнаш кумылан-влакын пеленышт эҥырышт лийшаш. Спонсор-влак пӧлекымат сайым ямдыленыт. Пӧлекше ты кечын ятыр лиеш, кажне конкурсышто.
Шахмат турнир оҥай лийшаш. Вет тидлан лӱмын Российын эн самырык гроссмейстерже Сергей Карякин толеш. Тудо лучко оҥаште кумылан-влак дене иканаште модаш тӱҥалеш. Пелен шахматым гына кондыман.
Ӧрдыж гыч толшо-шамычлан оласе администраций шижтара: ты кечылаште кок паром 6 шагат эр гыч 21 шагат кас марте пашам ышта. Билетын акше кугыеҥлан — 50 теҥге, икшывылан — 25 теҥге, пенсионерлан — 30 теҥге.
Легковой автомобильлан 270 теҥгем (нелытше ик тонн марте), тонно деч утларак нелытанлан 330 теҥгем тӱлыман.
С.Носова
