27 майыште Йошкар-Оласе Патриарший площадьыште «Таза улына – Ме» («Здоровые – Мы») III форум эрта.
Мероприятийым «Марий Эл Республикын молодёжный правительствыже» ушем, регионын Тазалыкым аралыме министерствыже, «Марий Эл Республикын врач-влак ассоциацийышт» регионысо мер ушем, «Волонтёр-медик-влак» всероссийский мер толкын организоватленыт.
Форумын медицине секторжо оҥай событийлан поян лияш сӧра. Патриарший площадьыште регистрироватлалтме деч вара форумын участникше-влак биометрический показательыштым висен , ты шотышто паспортым налын, «СОГАЗ-Мед» страховой компаний» АО-н Марий филиалжын, Врачебно-физкультурный диспансерын, Йошкар-Оласе медицине рӱдер-влакын, медик-шамычын волонтёр организацийыштын темлыме информационный чыла площадкыштым эртен кертыт.
Врач-эндокринолог-влак сакыр диабет да йод ситыдыме дене кылдалтше моло чер, гастроэнтеролог-шамыч пагар-шолора корно, уто нелытым погымо, кояҥме дене кылдалтше чер, травматолог-влак эҥертыме-тарванылме (опорно-двигательный) аппаратын черже, торакальный хирург-шамыч шодо чер, кардиолог-влак шӱм чер нерген каласкалат.
Кумылан чыла еҥ ВИЧ-лан тестированийым яра эртен да донорствын куснылшо рӱдерыштыже вӱрым пуэн кертеш.
Мероприятийыште площадке-влакым эртыше участник-шамычлан призым модын налаш лийме сертификатым кучыктат.
Форум 10 шагатлан тӱҥалеш .
М.ИВАНОВА.