Российыште шӱк реформым илышыш пуртымылан вашке ныл тылзат лиеш. Тудо торым погымо да лукмо услугым пуышо оператор дене веле огыл, калык денат чак кылдалтын. Кузе? Тиде йодышлан Звенигово районысо Шолэҥер ял шотан илем администрацийым вуйлатышын пашажым шуктышо Елена Васильева (снимкыште) тыге вашештыш:
– Чыным каласаш гын, калык шӱк реформым куаненжак ыш вашлий, поснак услугылан палемдыме акым кызытат утыждене кугулан шотла. Квитанций дене кылдалтше икмыняр умылыдымаш лекте, но тиде йодыш дене ынде районыштына лӱмын палемдыме инспектор пашам ышта, сандене чыла йодышым тудо рашемда. Специалист дене кылым кучаш неле огыл, молан манаш гын телефонжо ден адресшым квитанцийыште ончыктымо.
Илемышкына официально 16 ял ден посёлко пурат, но Кожлаҥгер шукертак пытен. Кум тылзыште «Благоустройство» ООО Шолэҥер посёлкыш, Шонсола, Аниссола, Кугунур, Спартак, Выльыпсола, Памаштӱр, Яктерлӱвал, Шолэҥер яллаш, Николаевский выселкыш чылаже 54 у евроконтейнерым шындыш. Памашсола, Чингансола, Кугу Шигак, Нурда яллаште да Тимофеевский выселкыште кызытеш мешак дене погат.
Торым эре жапыштыже луктыт. Телым лумым жапыштыже шӱкен кертдымылан, шошым лумын лапашыш савырнымыжлан кӧра мусоровоз, конешне, южо площадкыш пурен ыш керт, но тыгай ситыдымашым писын кораҥдышна. Ужам, калыкат услуго дене чаткан пайдаланаш тырша: торым айда-йӧра ок кышкылт, контейнерым леведыш дене петыра, бакым южгунамже эсогыл йӧнанрак верыш шӱкен наҥгая. Мыйын шонымаште, шӱк реформо эркын дене шке йогынышкыжо пура.
М.ИВАНОВА
